லௌசான் ரோமன் அருங்காட்சியகத்தில் பழங்கால தங்க நாணயங்கள் கொள்ளை.

சுவிட்சர்லாந்தின் லௌசானில் உள்ள ரோமன் அருங்காட்சியகத்தில், தொல்பொருள் மதிப்புள்ள பல டசின் தங்க நாணயங்கள் திருடப்பட்டுள்ளன.

செவ்வாய்க்கிழமை கட்டிடம் மூடப்படுவதற்கு சற்று முன்னர் அருங்காட்சியக கட்டிடத்திற்குள் நுழைந்த இரண்டு அடையாளம் தெரியாத நபர்கள் கொள்ளையில் ஈடுபட்டுள்ளனர்.

“திருடப்பட்ட பொருட்களின் சரியான எண்ணிக்கையைக் கண்டறியவும், காணாமல் போன வேறு ஏதேனும் பொருட்களை அடையாளம் காணவும் தற்போது ஒரு சரக்கு பட்டியல் சரிபார்ப்பு பணி மேற்கொள்ளப்படுகிறது.

இவை தொல்பொருள் மதிப்புள்ள பொருட்கள் என்பதால், சேதத்தின் அளவு இன்னும் தெரியவில்லை,” என்று லௌசானே நகர காவல்துறை அறிவித்ததுள்ளது.

விசாரணைக்காக அருங்காட்சியகம் புதன்கிழமை மூடப்பட்டு வியாழக்கிழமை மீண்டும் திறக்கப்பட்டது.

செவ்வாய்க்கிழமை பிற்பகல் 4:45 மணியளவில் குற்றவாளிகள் வழக்கம் போல் டிக்கெட் கவுண்டரில் டிக்கெட்டுகளை வாங்கிய பிறகு ரோமன் அருங்காட்சியகத்திற்குள் நுழைந்துள்ளனர்.

விசாரணையின் ஆரம்ப கண்டுபிடிப்புகளின்படி, மாலை 6:00 மணிக்கு அருங்காட்சியகம் மூடப்படுவதற்கு சற்று முன்பு இருவரும் பாதுகாப்புக் காவலரைத் தாக்கி கீழே தள்ளினர். இந்த நேரத்தில், கடைசி பார்வையாளர்கள் ஏற்கனவே வளாகத்தை விட்டு வெளியேறிவிட்டனர்.

பின்னர் அவர்கள் ஒரு பாதுகாக்கப்பட்ட காட்சிப் பெட்டியைத் திறந்து உள்ளே காட்சிப்படுத்தப்பட்ட பல தங்க நாணயங்களைத் திருடிச் சென்றனர். குற்றவாளிகள் தப்பி ஓடிய பிறகு, பாதுகாப்பு காவலர் கொள்ளை எச்சரிக்கை மணியை இயக்க முடிந்தது.

அருங்காட்சியக ஊழியர், 64 வயதான சுவிஸ் நாட்டவர், புலனாய்வாளர்களால் விசாரிக்கப்பட்டார். அவர் காயமடையவில்லை என்று காவல்துறை தெரிவித்துள்ளது.

குற்றம் நடந்த நேரத்தில் வேறு யாரும், பார்வையாளர்கள் அல்லது ஊழியர்கள் யாரும் இல்லை.

மூலம்- swissinfo