சுவிட்சர்லாந்தின் பத்து கட்டுமானத் தளங்களில் எட்டு, வெப்பநிலை 33°C-ஐ எட்டும்போது வழக்கமான வெப்ப அலை இடைவேளைகளை மேற்கொள்வதற்கு தவறுவதாக யுனியா தொழிற்சங்கம் தெரிவித்துள்ளது.
ஜூலை மாதம், யுனியா தொழிற்சங்கம் சுவிட்சர்லாந்தின் அனைத்துப் பகுதிகளிலிருந்தும் 984 கட்டுமானத் தொழிலாளர்களிடம் வெப்பப் பாதுகாப்பு நடவடிக்கைகள் செயல்படுத்தப்படுவது குறித்து ஒரு கணக்கெடுப்பை நடத்தியது.
முடிவுகளின்படி, வெப்பநிலை 33 டிகிரி செல்சியஸை எட்டும்போது தேவைப்படும், ஒரு மணி நேரத்திற்கு 15 நிமிட இடைவேளைகள், கணக்கெடுப்பில் பங்கேற்றவர்களில் 18% பேருக்கு மட்டுமே தொடர்ந்து வழங்கப்படுகின்றன.
பதிலளித்தவர்களில் சுமார் 67% பேர் இடைவேளைகள் ஒருபோதும் வழங்கப்படுவதில்லை என்றும், 15% பேர் ‘சில நேரங்களில்’ மட்டுமே வழங்கப்படுவதாகவும் கூறியுள்ளனர்.
ஓய்வு இடங்களைப் பொறுத்தவரை நிலைமை இதைவிடச் சிறப்பாக இல்லை. கணக்கெடுப்பில் பங்கேற்ற தொழிலாளர்களில் மூன்றில் ஒரு பகுதியினர், தங்கள் இடைவேளைகளை எடுத்துக் கொள்ளத் தொடர்ந்து குளிர்ச்சியான இடம் இருப்பதாகக் கூறியுள்ளனர். கால் பகுதியினருக்கு அவ்வாறு இல்லை, மேலும் 43% பேருக்கு எப்போதாவது மட்டுமே கிடைக்கிறது.
மூன்றில் இரண்டு பங்கிற்கும் அதிகமானோர், நாளின் வெப்பமான பகுதியைத் தவிர்ப்பதற்காக வேலை நேரம் மாற்றப்படவில்லை என்று கூறியுள்ளனர்.
யுனியாவின் கூற்றுப்படி, வெப்பநிலைமானி 39 டிகிரியை எட்டும்போது கூட, பெரும்பாலான தொழிலாளர்கள் நாள் முழுவதும் தொடர்ந்து வேலை செய்கிறார்கள்.
கணக்கெடுப்பில் பங்கேற்றவர்களில் சுமார் 15% பேர், வெப்ப அலையின் போது தாங்களே உடல்நலப் பாதிப்புக்கு உள்ளானதாகவோ அல்லது தங்கள் சக ஊழியர் ஒருவர் அவ்வாறு பாதிக்கப்பட்டதைக் கண்டதாகவோ தெரிவித்தனர்.
வெப்பநிலை 30 டிகிரியைத் தாண்டும்போது இந்த ஆபத்து மேலும் 7% அதிகரிக்கிறது என்று அந்தத் தொழிற்சங்கம் மேலும் கூறுகிறது.
செயல்திறன் மிக்க சோதனைகள் இல்லாதது குறித்தும், விதிமீறல்கள் ஏற்பட்டால் தண்டனைகள் இல்லாதது குறித்தும் யூனியா கவலை வெளியிட்டுள்ளது. “தற்போது, சட்டத்தை அமல்படுத்துவதில் உண்மையான அவசர நிலை உள்ளது.” என்றும் அது கூறியுள்ளது.
கட்டுமானப் பணிகளுக்கான அவசரச் சட்டத்தில் 33 டிகிரி வரம்பைச் சேர்க்க வேண்டும் என்று அது இப்போது கோருகிறது. இந்த வெப்பநிலை எட்டப்பட்டவுடன், குளிரூட்டப்பட்ட பகுதியில் ஒரு மணி நேரத்திற்கு 15 நிமிட இடைவேளைக்கு உத்தரவாதம் அளிக்கப்படாவிட்டால், வெளிப்புறத்தில் செய்யப்படும் கடினமான உடல் உழைப்பு இடைநிறுத்தப்பட வேண்டும். இந்த இடைவேளைகள் வேலை நேரமாகக் கணக்கிடப்பட வேண்டும்.
தொழிற்சங்கமானது, சுவாவில் ஆய்வுகளைத் தீவிரப்படுத்த வேண்டும் என்றோ அல்லது மாகாணங்கள் போன்ற பிற அமைப்புகள் மூலமான ஆய்வுகளைத் தீவிரப்படுத்த வேண்டும் என்றோ வலியுறுத்துகிறது.
வெப்ப அலைகளின் போது அபராதமின்றி கட்டுமானப் பணிகளுக்கான காலக்கெடுவை நீடிக்க அனுமதிக்கும் ஒரு தீர்மானத்தை நாடாளுமன்றம் நிறைவேற்ற வேண்டும் என யூனியா விரும்புகிறது. மோசமான வானிலைக்கான இழப்பீட்டுத் திட்டமும், கடும் வெப்பத்தால் ஏற்படும் வேலை நிறுத்தங்களை ஈடுசெய்யும் வகையில் மாற்றியமைக்கப்பட வேண்டும்.
கூட்டாட்சி ஒழுங்குமுறை வரும் வரை, மாகாணங்களும் உள்ளூர் அதிகாரிகளும் தங்களின் விருப்புரிமையைப் பயன்படுத்தி உள்ளூர் வேலை நிலைமைகளை விதிக்க வேண்டும் என யூனியா விரும்புகிறது.
மூலம்- swissinfo
