சுவிட்சர்லாந்தில் மருத்துவக் காப்பீட்டுக் கட்டணங்கள் மீண்டும் அதிகரித்து வரும் நிலையில், குறைந்த கட்டணத்தில் கிடைக்கும் சுகாதாரக் காப்பீட்டுச் சேமிப்பு திட்டங்களைப் பயன்படுத்தும் மக்கள் எச்சரிக்கையுடன் இருக்க வேண்டும் என நுகர்வோர் பாதுகாப்பு அமைப்பு அறிவுறுத்தியுள்ளது.
சுவிட்சர்லாந்தின் பத்து பெரிய சுகாதாரக் காப்பீட்டு நிறுவனங்களின் விதிமுறைகளை ஒப்பிட்டு ஆய்வு செய்ததில், விதிமீறல்களுக்கான தண்டனைகளில் நிறுவனங்களுக்கு இடையே குறிப்பிடத்தக்க வேறுபாடுகள் இருப்பது தெரியவந்துள்ளது.
முதல் தவறுக்கே கடும் நடவடிக்கை!
Assura மற்றும் KPT ஆகிய காப்பீட்டு நிறுவனங்களின் சில சேமிப்புத் திட்டங்களிலும், Helsana நிறுவனத்தின் அனைத்து சேமிப்புத் திட்டங்களிலும், முதல் முறையாக விதிமீறல் ஏற்பட்டால்கூட கடுமையான நடவடிக்கைகள் எடுக்கப்படலாம் என நுகர்வோர் பாதுகாப்பு அமைப்பு தெரிவித்துள்ளது.
இதன்படி, காப்பீடு பெற்றவர்கள் அதிக கட்டணம் கொண்ட வழக்கமான காப்பீட்டுத் திட்டத்திற்கு மாற்றப்படலாம். மேலும், சில சந்தர்ப்பங்களில் மருத்துவச் சிகிச்சைக்கான செலவுகளை காப்பீட்டு நிறுவனம் ஏற்க மறுக்கலாம். இவ்விரு நடவடிக்கைகளும் ஒரே நேரத்தில் எடுக்கப்படுவதற்கும் வாய்ப்புள்ளது.
மற்ற காப்பீட்டு நிறுவனங்களின் நடைமுறைகள்
CSS மற்றும் Visana நிறுவனங்கள் பொதுவாக இரண்டாவது விதிமீறலுக்குப் பின்னரே தண்டனை நடவடிக்கைகளை மேற்கொள்கின்றன. அதேவேளை, Concordia, Groupe Mutuel, Sanitas மற்றும் புதிதாக இந்தப் பட்டியலில் இடம்பெற்றுள்ள Swica ஆகிய நிறுவனங்கள் பொதுவாக மூன்றாவது விதிமீறலுக்குப் பின்னரே நடவடிக்கை எடுப்பதாகத் தெரிவிக்கப்பட்டுள்ளது.
சுவிட்சர்லாந்து மக்கள்தொகையில் சுமார் நான்கில் மூன்று பங்கினர், மருத்துவரைத் தேர்ந்தெடுப்பதில் கட்டுப்பாடுகள் கொண்ட சேமிப்புக் காப்பீட்டுத் திட்டங்களைப் பயன்படுத்துகின்றனர். எனவே, இந்த விதிமுறைகள் பெருமளவிலான மக்களைப் பாதிக்கக்கூடும்.
நுகர்வோர் பாதுகாப்பு அமைப்பின் கோரிக்கை
நுகர்வோர் பாதுகாப்பு அமைப்பின் நிர்வாக இயக்குநர் சாரா ஸ்டால்டர் (Sara Stalder), நோய்வாய்ப்பட்ட ஒருவர் மருத்துவரைச் சந்திப்பதற்கு முன்பு கட்டாயமாகத் தொலைமருத்துவச் சேவையை (Telmed) தொடர்புகொள்ள மறந்துவிட்டால், உடனடியாகத் தண்டிக்கப்படக் கூடாது என வலியுறுத்தியுள்ளார்.
முதலில் நினைவூட்டல் வழங்கப்பட வேண்டும் என்றும் அவர் கோரிக்கை விடுத்துள்ளார்.
சில காப்பீட்டு நிறுவனங்கள் தங்களது எழுத்துப்பூர்வ விதிமுறைகளைக் காட்டிலும் நடைமுறையில் மென்மையாகச் செயல்படக்கூடும். இருப்பினும், அதனை நம்பி விதிமுறைகளைப் புறக்கணிக்கக் கூடாது என அமைப்பின் சுகாதாரப் பிரிவுத் தலைவர் சாரா லெங்க்யெல் (Sarah Lengyel) எச்சரித்துள்ளார்.
