பிரான்சில் நடைபெற்று வரும் போராட்டங்களுக்கு இணையாக, சனிக்கிழமை இரவு சூரிச் மற்றும் பாசல் நகரங்களில், “On en a marre – en Suisse aussi” [எங்களுக்குப் போதும் – சுவிட்சர்லாந்திலும் போதும்] என்ற முழக்கத்துடன் நூற்றுக்கணக்கான மக்கள் போராட்டத்தில் ஈடுபட்டனர்.
அனுமதியின்றி நடத்தப்பட்ட இந்த இரண்டு போராட்டங்களும் வன்முறையில் முடிந்ததால், காவல்துறையினர் தலையிட வேண்டிய சூழல் ஏற்பட்டது.
சூரிச்சில், ஹாலோவீன் முகமூடிகளை அணிந்திருந்தவர்கள் உட்பட நூற்றுக்கணக்கான மக்கள், இரவு 10:30 மணியளவில் நகர மையத்திலுள்ள லாங்ஸ்ட்ராஸ் (Langstrasse) பகுதியில் கூடினர். அங்கிருந்து ஹெல்வெட்டியாபிளாட்ஸ் (Helvetiaplatz) நோக்கிச் சென்ற கூட்டத்தினர், பட்டாசுகளையும் ஒளிரும் புகைக் குண்டுகளையும் (flares) வெடித்தனர். இந்த இடம் முக்கிய ரயில் நிலையத்திலிருந்து சில நூறு மீட்டர் தொலைவில் உள்ளது.
போராட்டக்காரர்கள் அந்தச் சதுக்கத்தை அடைந்ததும் சூழல் மாறியது. அங்குள்ள பேருந்து நிறுத்தத்தின் மேற்கூரை சேதப்படுத்தப்பட்டது; குப்பைத் தொட்டிகள், மிதிவண்டிகள் மற்றும் பிற பொருட்களைக் கொண்டு அமைக்கப்பட்ட தடுப்புகள் தீயிட்டுக் கொளுத்தப்பட்டன.
போராட்டக்காரர்களைக் கலைக்க காவல்துறையினர் நீர்ப் பீரங்கிகளைப் பயன்படுத்தினர். நகராட்சி காவல்துறையின் தகவல்படி, சில சிறிய குழுக்கள் பல்வேறு இடங்களில் குப்பைத் தொட்டிகளுக்குத் தீ வைத்தன. ஒரு கார் எரிக்கப்பட்டதுடன், பல கடைகளின் ஜன்னல் கண்ணாடிகளும் உடைக்கப்பட்டன. தங்களின் மீது பட்டாசுகள், போத்தல்கள் மற்றும் கற்கள் வீசப்பட்டதாகக் காவல்துறையினர் தெரிவித்தனர்.
இதற்குப் பதிலடியாக அவர்கள் கண்ணீர்ப்புகைக் குண்டுகளையும் ரப்பர் குண்டுகளையும் பயன்படுத்தினர். இந்த மோதல்கள் இரவு 1:30 மணி வரை நீடித்தன.
மருத்துவ அவசர உதவிக்காகச் சென்ற காவல் ரோந்து வாகனம் ஒன்றின் மீது கும்பல் தாக்குதல் நடத்தியதாகக் காவல்துறை தெரிவித்துள்ளது. அந்த வாகனத்தைச் சேதப்படுத்தியதால், காவல்துறையினர் அங்கிருந்து பின்வாங்க வேண்டிய கட்டாயம் ஏற்பட்டது. இதனால், விபத்தொன்றில் சிக்கி காலில் பலத்த காயமடைந்த பதின்ம வயது இளைஞர் ஒருவருக்கு உதவ முடியாமல் போனது.
பாசல் நகரில், இரவு 9 மணியளவில் சுமார் 150 பேர் நகர மையத்தில் கூடியதாக மாகாணக் காவல்துறை அறிக்கை ஒன்றில் தெரிவித்துள்ளது.
போராட்டக்காரர்கள் ‘மிட்லெரே ரெய்ன்புருக்கே’ (Mittlere Rheinbrücke) பாலத்தைக் கடந்து சென்றனர். இந்தப் பாலம் ரைன் ஆற்றின் குறுக்கே அமைந்து, ஆற்றின் இடது கரையில் உள்ள நகர மையத்தையும், வலது கரையில் உள்ள க்ளெய்ன்பாசல் (Kleinbasel) பகுதியையும் இணைக்கிறது.
அங்கிருந்து அவர்கள் வரலாற்றுச் சிறப்புமிக்க நகர மையத்தின் இதயப்பகுதியான மார்க்ஸ்ப்ளாட்ஸ் (Marktplatz) சென்றடைந்தனர். பின்னர் அங்கிருந்து வடக்கே செயின்ட் ஜோஹான் (St. Johann) மாவட்டத்தை நோக்கி நகர்ந்தனர்.
அங்கு சில போராட்டக்காரர்கள் குப்பைத் தொட்டிகள் மற்றும் உலோகத் தடுப்புகளைக் கொண்டு அமைத்திருந்த தடைகளுக்குத் தீ வைத்தனர்; இதனைத் தொடர்ந்து காவல்துறையினர் தலையிட்டனர்.
சூரிச்சில் நடந்தது போலவே, பாசலில் போராடியவர்களும் பிரான்ஸ் மற்றும் பிற ஐரோப்பிய நாடுகளில் நடைபெற்ற இளைஞர் போராட்டங்களுடன் தங்களை ஒப்பிட்டுப் பேசினர்.
சமீபத்திய நாட்களில், அடையாளம் தெரியாத சிலர் சமூக ஊடகங்கள் வாயிலாக “GenZ regelt!” [தலைமுறை Z பொறுப்பேற்கிறது!] என்ற முழக்கத்தை முன்வைத்துள்ளனர்; இந்த வாசகத்தை ஜெர்மனியில் உள்ள இளம் போராட்டக்காரர்களும் பயன்படுத்தி வருகின்றனர்.
மூலம்- swissinfo
