FC Lucerne கால்பந்துப் போட்டிகள் தொடர்பான வன்முறைச் சம்பவங்களைக் குறைப்பதை நோக்கமாகக் கொண்ட இரண்டு முன்மொழிவுகள் மீது நேற்று Lucerne-இல் வாக்கெடுப்பு நடைபெற்றது.
முதல் முன்மொழிவானது ‘ரசிகர்களின் வன்முறைக்கு எதிரான’ சென்டர் கட்சியின் முயற்சியாகும்; இது கடுமையான நடவடிக்கைகளை வலியுறுத்தியது.
இரண்டாவது முன்மொழிவு Lucerne மாநில நாடாளுமன்றத்தின் மாற்று முன்மொழிவாகும். இவ்விரு முன்மொழிவுகளும் அங்கீகரிக்கப்பட்டன.
முதல் முன்மொழிவு 52.8% வாக்குகளையும், இரண்டாவது 74.8% வாக்குகளையும் பெற்றன. துணை வினாவாக அமைந்த வாக்கெடுப்பில், Lucerne மக்கள் 58.8% ஆதரவுடன் மாற்று முன்மொழிவை ஏற்றுக்கொண்டனர். மொத்த வாக்களிப்பு சதவீதம் 48.7% ஆக இருந்தது.
சென்டர் கட்சியின் முன்முயற்சிக்கு மாறாக, சட்டமன்றத்தால் உருவாக்கப்பட்ட மாற்று முன்மொழிவானது தடுப்பு நடவடிக்கைகள், பேச்சுவார்த்தை, கிளப்புகளின் கூடுதல் பொறுப்புணர்வு மற்றும் CCTV கண்காணிப்பு ஆகியவற்றில் அதிக கவனம் செலுத்துகிறது; அதேவேளையில், தேசிய அளவிலான ஒருங்கிணைப்பு தேவைப்படும் தனிநபர் அடையாளச் சோதனைகளை இது தவிர்த்துவிடுகிறது.
தற்போதைய நடைமுறைகளைச் சட்டப்பூர்வமாக்குவதைத் தவிர இதில் உண்மையான மாற்றம் ஏதுமில்லை என்று கருதியதால், சென்டர் கட்சிஇந்த அணுகுமுறையை விமர்சித்திருந்தது. இதற்குப் பதிலளித்த Lucerne மாநில அரசும் பிற கட்சிகளும், அந்த முன்முயற்சி சில அம்சங்களை மட்டுமே கையாள்வதாகவும், தேசிய அளவிலான முயற்சிகளுடன் ஒருங்கிணைக்கப்படாததால் அது பயனுள்ளதாக இருக்காது என்றும் வாதிட்டன.
மூலம்- swissinfo
