அமெரிக்காவைச் சேர்ந்த ஒருவர் பீட்ரூட்டை அதிகளவில் சாப்பிட்டதால் உயிராபத்தை எதிர்கொள்ளும் நிலைக்கு தள்ளப்பட்டார்.
அவர் வாரத்திற்கு 2.7 கிலோகிராம் வரை பீட்ரூட்டை, சமைத்த உணவாகவும் சாறாகவும் உட்கொண்டு வந்தார்.
கலிபோர்னியா பல்கலைக்கழகத்தின் அவசர மருத்துவத் துறையைச் சேர்ந்த ஆராய்ச்சியாளர்களின் அறிக்கையின்படி, இந்த பழக்கம் அவரது உயிருக்கே ஆபத்தை விளைவிக்கும் நிலைக்கு தள்ளியது.
ஒரு நாள் மாலை, இரவு உணவிற்குப் பிறகு, 82 வயதான அந்த நபருக்கு திடீரென கடுமையான தலைச்சுற்றல் ஏற்பட்டது. இதனால் அவர் அவசர சிகிச்சைப் பிரிவிற்குச் செல்ல வேண்டியிருந்தது. மருத்துவமனையில், அவருக்கு இரத்த ஓட்டச் சரிவு (circulatory collapse), குறைந்த இரத்த அழுத்தம் மற்றும் ‘சயனோசிஸ்’ (cyanosis) – அதாவது தோல் ஊதா அல்லது நீல நிறமாக மாறுதல் – இருப்பது கண்டறியப்பட்டது.
அவருக்கு ஒக்சிஜன் வழங்கப்பட்ட போதிலும், அவரது இரத்தத்தில் ஒக்சிஜன் அளவு ஆபத்தான வகையில் 88 சதவீதமாகவே இருந்தது. ஆரோக்கியமான நபர்களுக்கு இந்த அளவு 95 முதல் 100 சதவீதமாக இருக்க வேண்டும்.
அதே சமயம், அவரது இரத்தத்தில் ‘மெத்தமோகுளோபின்’ (methemoglobin) அளவு 20.9 சதவீதமாக மிக அதிகமாக இருந்தது; இது அனுமதிக்கப்பட்ட உச்ச வரம்பையும் தாண்டியிருந்தது. இதைக் கொண்டு, மருத்துவக் குழுவினர் அவருக்கு ‘மெத்தமோகுளோபினீமியா’ (methemoglobinemia) பாதிப்பு இருப்பதை உறுதி செய்தனர்.
மருத்துவக் குழுவினர் அந்த நபருக்கு ‘மெத்திலீன் புளூ’ (methylene blue) என்ற மருந்தினை ஊசி மூலம் செலுத்தினர். அதன் பிறகு, அவரது உடல்நிலை விரைவாக முன்னேறியது.
தோல் நிறமாற்றம் மறைந்தது, மெத்தமோகுளோபின் அளவு இயல்பு நிலைக்குத் திரும்பியது, மேலும் இரத்தத்தில் ஒக்சிஜன் அளவு 99 சதவீதமாக உயர்ந்தது. கூடுதல் ஒக்சிஜன் உதவி ஏதுமின்றி இது நிகழ்ந்தது. விரைவில் அவர் மருத்துவமனையிலிருந்து வீடு திரும்பினார். அவருக்கு பீட்ரூட் உட்கொள்ளும் அளவைக் கணிசமாகக் குறைக்குமாறு அறிவுறுத்தப்பட்டது.
‘மெத்திலீன் புளூ’ (Methylene blue – MB), ‘மெத்தில்தியோனினியம் குளோரைடு’ (methylthioninium chloride) என்றும் அழைக்கப்படுகிறது. இது ஆரம்பத்தில் துணிகளுக்கு வண்ணம் பூசப் பயன்படுத்தப்பட்ட ஒரு செயற்கை சாயமாகும். தற்போது இது மீன் தொட்டிகளைச் சுத்தம் செய்யும் கிருமிநாசினியாகவும், வேதியியல், உயிரியல் மற்றும் மருத்துவம் போன்ற பல்வேறு துறைகளிலும் பயன்படுத்தப்படுகிறது.
‘மெத்தமோகுளோபினீமியா’ பாதிப்பின் போது, இது ஒரு மருந்தாகச் செயல்பட்டு, மாற்றமடைந்த ஹீமோகுளோபினை மீண்டும் அதன் இயல்பு நிலைக்கு மாற்ற உதவுகிறது.
இந்தச் சிக்கலுக்கு பீட்ரூட் மட்டுமே காரணமல்ல. 82 வயதான அந்த நபர் அதிக அளவில் பீட்ரூட்டை உட்கொண்டதுடன், கடுமையான கரோனரி தமனி நோய்க்காக (coronary artery disease) தினமும் ‘ஐசோசோர்பைடு மோனோநைட்ரேட்’ (isosorbide mononitrate) என்ற மருந்தையும் எடுத்து வந்தார்.
இந்த மருந்திலும் நைட்ரேட்டுகள் உள்ளன; இவை இரத்த நாளங்களை விரிவடையச் செய்து, இரத்த அழுத்தத்தைக் குறைக்கின்றன. பீட்ரூட்டிலும் அதிக அளவில் நைட்ரேட்டுகள் இருப்பதால், அதுவும் இதே போன்ற விளைவையே ஏற்படுத்துகிறது.
மூலம்- 20min
