போலந்தின் கிராக்கோவின் முதன்மைச் சந்தைச் சதுக்கத்தில் நிகழ்ந்த கொடிய தாக்குதலைத் தொடர்ந்து, கைது செய்யப்பட்ட 25 வயது நபரின் வீட்டில் காவல்துறையினர் சோதனை நடத்திய போது, மூன்று சடலங்கள் கண்டெடுக்கப்பட்டுள்ளன.
போலந்து பிரதமர் டொனால்ட் டஸ்க், அவசரக்காலக் குழுவின் செய்தியாளர் சந்திப்பில், ட்ரோன் மூலம் எடுக்கப்பட்ட காட்சிகளின் அடிப்படையில் இந்தத் தகவல் தெரியவந்ததாகக் கூறினார்.
உயிரிழந்தவர்களில் இருவர் பெண்கள், ஒருவர் ஆண். இவர்கள் சந்தேக நபரின் நெருங்கிய குடும்ப உறுப்பினர்களாக இருக்கலாம் என்று கருதப்படுகிறது.
அந்த வீட்டில் வெடிபொருட்கள் இருக்கலாம் என்ற சந்தேகமும் எழுந்துள்ளது. தாக்குதலுக்கான பின்னணி குறித்து டஸ்க் கூடுதல் விவரங்களை வெளியிடவில்லை. தாக்குதல் நடத்தியவரின் நோக்கம் குறித்த தகவல்களை விரைவில் கண்டறிய காவல்துறை, பாதுகாப்பு அமைப்புகள் மற்றும் அரசு வழக்கறிஞர் அலுவலகம் ஆகியவை முழு முயற்சியுடன் செயல்படும் என்று அவர் வலியுறுத்தினார்.
தாக்குதல் நடத்திய நபர் “மிகவும் தீவிரமான கருத்துகளை” கொண்டிருந்ததாகக் கூறப்படுகிறது.
போலந்து உள்துறை அமைச்சர் மார்சின் கீர்வின்ஸ்கியின் கூற்றுப்படி, இந்த 25 வயது நபர் தீவிர வலதுசாரி சித்தாந்தங்களால் ஈர்க்கப்பட்டிருந்தார்; இருப்பினும், இது குறித்து மேலும் விசாரணை நடத்தப்பட வேண்டியுள்ளது. போலந்து நாட்டைச் சேர்ந்த இவர், நாட்டின் தென்கிழக்குப் பகுதியில் உள்ள ஸ்வியேடோக்ஷிஸ்கி (Świętokrzyskie) மாகாணத்தைச் சேர்ந்தவர்.
சனிக்கிழமையன்று கிராக்கோவின் முதன்மைச் சந்தைச் சதுக்கத்தில் நடத்தப்பட்ட துப்பாக்கிச் சூடு தாக்குதலில் ஆறு பேர் கொல்லப்பட்டனர்; குறைந்தது 15 பேர் காயமடைந்தனர், அவர்களில் பலரது நிலை கவலைக்கிடமாக உள்ளது.
தற்போதைய தகவல்களின்படி, உயிரிழந்தவர்களில் ஒருவர் வெளிநாட்டவர்; காயமடைந்தவர்களில் ஐந்து பேரும் வெளிநாட்டவர்கள் ஆவர்.
மூலம்- bluewin
