சுவிட்சர்லாந்தில் அன்லெட்டட் 95 பெட்ரோலின் சராசரி விலை சுமார் 1.90 பிராங்குகளாகவும், அன்லெட்டட் 98 பெட்ரோலின் விலை 2.01 பிராங்குகளாகவும், டீசலின் விலை 2.17 பிராங்குகளாகவும் உள்ளது – இவை இந்த ஆண்டின் பெட்ரோல் விலைகளிலேயே மிக உயர்ந்தவையாகும்.
ஈரானுடனான டொனால்ட் டிரம்பின் போர் மற்றும் ஹோர்முஸ் நீரிணை மீதான முற்றுகை காரணமாக, சமீப வாரங்களில் பெட்ரோல் விலைகள் அதிரித்துள்ள நிலையில், இந்த வாரத்தின் தொடக்கத்தில் மற்றொரு அதிர்ச்சி காத்திருந்தது. ஐக்கிய அரபு அமீரகம் ஒபெக் அமைப்பிலிருந்து வெளியேறுகிறது.
அதே நேரத்தில், மசகு எண்ணெய் விலைகள் விண்ணை முட்டும் அளவுக்கு உயர்ந்துள்ளன. நேற்ற ஒரு பரல் ப்ரெண்ட் மசகு எண்ணெயின் விலை 126 டொலரைத் தாண்டியது. இது உக்ரைன் போரின் ஆரம்ப மாதங்களுக்குப் பின்னர் காணப்படாத ஒரு நிலையை எட்டியுள்ளது. ஆய்வாளர்களின் கூற்றுப்படி, இது முடிவாக இருக்காது.
இதனால் விரைவில் ஒரு லிட்டர் பெட்ரோலுக்கு 10 பிராங்குகள் செலுத்த வேண்டியிருக்குமா? ஒபெக் அமைப்பிலிருந்து எமிரேட்ஸ் விலகுவது, வளைகுடாப் பகுதிகளின் முடக்கத்திற்கு என்ன விளைவுகளை ஏற்படுத்தும்? டொனால்ட் டிரம்ப் தலைமையிலான அமெரிக்காவிடம், அஞ்சப்படுவது போல் நிலைமை மோசமடைவதைத் தடுக்க ஏதேனும் திட்டம் உள்ளதா?என்பன போன்ற கேள்விகளை எழுப்பியுள்ளது.
ஒரு லிட்டர் எரிபொருளுக்கு 10 பிராங்குகள் என்பது பீதியால் தூண்டப்பட்ட ஒரு கற்பனை மற்றும் அது நிகழ்வதற்கு மிகவும் சாத்தியமற்றது. அதற்கு ஒரு தீவிரமான சூழ்நிலை தேவைப்படும்.
அதாவது, ஹோர்முஸ் பாதையில் மிக நீண்ட காலத் தடை, பெருமளவில் உயரும் மசகு எண்ணெய் விலைகள், விநியோகக் குழப்பம் மற்றும் பீதியால் விதிக்கப்படும் கூடுதல் கட்டணங்கள் போன்ற கொந்தளிப்புகள் இருந்தபோதிலும், சந்தை அந்த நிலைக்கு வெகு தொலைவில் உள்ளது.
எண்ணெய் விலைகள் ஆரம்பத்தில் உயரும், ஆனால் அது ஒபெக் அமைப்பிலிருந்து எமிரேட்ஸ் வெளியேறுவதால் அல்ல.
நிச்சயமாக, ஒபெக் அமைப்பிலிருந்து ஐக்கிய அரபு எமிரேட்ஸ் விலகுவதாக அறிவித்தது ஒரு சமிக்ஞைதான் – அதுவும் மிகவும் அழுத்தமான ஒரு சமிக்ஞை. குறுகிய காலத்தில், இது சந்தையில் நிச்சயமற்ற தன்மையை உருவாக்குகிறது, மேலும் நிச்சயமற்ற தன்மை இருக்கும்போது விலைகள் உயரவே செய்யும்.
ஆனால் கடந்த சில நாட்களாக ஏற்பட்ட கடுமையான விலை உயர்வுக்கு எமிரேட்ஸ் பொறுப்பல்ல: ஒபெக் அமைப்பிலிருந்து வெளியேறுவது என்பது எரிபொருள் விலையில் ஏற்பட்ட ஒரு பெரும் அதிர்ச்சியை விட, ஒரு அதிகாரப் பரிமாற்றமாகவே உள்ளது.
இருப்பினும், ஒபெக் அமைப்பிலிருந்து எமிரேட்ஸ் வெளியேறுவது எண்ணெய் சந்தையை உலுக்கி வருகிறது.
“மே 1 அன்று ஒபெக்+ அமைப்பிலிருந்து வெளியேறுவதாக ஐக்கிய அரபு எமிரேட்ஸ் வெளியிட்டுள்ள இந்த ஆச்சரியமான அறிவிப்பு, உலகளாவிய எரிசக்தி சந்தையில் உடனடித் தாக்கத்தை ஏற்படுத்தாது.
இருப்பினும், ஹோர்முஸ் நீரிணை மீண்டும் திறக்கப்பட்டவுடன், உலகளாவிய விநியோகம் வழக்கத்தை விட அதிகமாக இருக்கும் என்பதை இந்த நடவடிக்கை உணர்த்துகிறது,” என்று கேபிடல் எகனாமிக்ஸ் நிறுவனத்தின் பொருளாதார நிபுணர் டேவிட் ஆக்ஸ்லி கருத்து தெரிவித்தார்.
மூலம்- bluewin