ரயில் மோதி ஒருவர் மரணம் – சந்தேகத்தில் பலர் கைது.

பர்க்டோர்ஃப் நிலையத்தில் வியாழக்கிழமை இரவு 8:30 மணியளவில் ரயில் மோதி ஒருவர் உயிரிழந்ததாக பெர்ன் மாகாண காவல்துறை தெரிவித்துள்ளது.

முதற்கட்ட விசாரணையின்படி, 2/3 நடைமேடையில் ஒரு குழுவினர் இருந்தனர் என்றும், ரயில், நிலையத்திற்குள் நுழைந்தபோது அவர்களில் ஒருவர் தண்டவாளத்தில் விழுந்தார் என்றும் தெரிவிக்கப்பட்டுள்ளது.

உடனடியாக ரயில் நிறுத்தப்பட்ட போதிலும், அந்த நபர் மீது ரயில் மோதி படுகாயம் அடைந்தார். அவசரகால மீட்புப் பணியாளர்கள் சம்பவ இடத்திலேயே அவருக்கு முதலுதவி அளிக்க முயன்றனர், ஆனால் அவர் அங்கேயே உயிரிழந்தார்.

இந்தச் சம்பவத்தின் சூழ்நிலைகள் தற்போது தெளிவாக இல்லை.

இது ஒரு விபத்தாக இருந்திருக்கலாம் அல்லது இதில் மூன்றாம் தரப்பினரின் ஈடுபாடு இருந்திருக்கலாம் என்ற சாத்தியக்கூறுகளை நிராகரிக்க முடியாது என பெர்ன் மாகாண காவல்துறை தெரிவித்துள்ளது.

குழுவில் இருந்த மற்ற ஆண்களின் பங்கு குறித்தும் தற்போது விசாரணை நடைபெற்று வருகிறது. அவர்கள் தற்காலிகமாக காவலில் வைக்கப்பட்டுள்ளனர்.

இந்த விசாரணையை எம்மென்டல்-ஓபரார்காவ் பிராந்திய அரசு வழக்கறிஞர் அலுவலகம் முன்னெடுத்து வருகிறது.

இறந்தவரின் அடையாளம் குறித்து உறுதியான தடயங்கள் ஏற்கனவே கிடைத்துள்ளன. இருப்பினும், முறையான அடையாளம் காணும் பணி இன்னும் நிலுவையில் உள்ளது.

இந்தச் சம்பவத்தைக் கண்டவர்கள் அல்லது நிகழ்வுக்கு முன்பு பர்க்டோர்ஃப் ரயில் நிலையத்தில் இருந்தவர்கள் முன்வருமாறு பெர்ன் மாகாண காவல்துறை கேட்டுக்கொள்கிறது.

மூலம்- bluewin