இத்தாலியின் பியட்மாண்ட் பகுதி வறட்சியால் கடுமையாகப் பாதிக்கப்பட்டுள்ளது. அப்பகுதிக்கு வழங்கப்படும் நீரின் அளவை அதிகரிக்குமாறு சுவிட்சர்லாந்தின் டிசினோ மாகாணத்திடம் கோரிக்கை விடுக்க பியட்மாண்ட் அரசாங்கம் திட்டமிட்டுள்ளது.
அதே நேரத்தில், வறட்சியின் காரணமாக அவசரநிலையை அறிவிக்க வேண்டும் என டுரினைத் தளமாகக் கொண்ட கோல்டிரெட்டி என்ற விவசாயிகள் சங்கம் கோரிக்கை விடுத்துள்ளது.
“இனி ஒரு நிமிடம் கூட எங்களால் காத்திருக்க முடியாது,” என்று அப்பகுதித் தலைவர் ஆல்பர்டோ சிரியோ கூறினார்.
அந்தப் பகுதியில் நிலவும் தண்ணீர் நெருக்கடி குறித்து விவாதிக்க, அவர் திங்களன்று ஒரு வட்டமேசை கூட்டத்தைக் கூட்டியிருந்தார் என இத்தாலிய செய்தி நிறுவனமான அன்சா தெரிவித்துள்ளது.
சுமார் 100 நகராட்சிகள் குடிநீர் பயன்பாட்டைக் கட்டுப்படுத்த ஏற்கனவே விதிமுறைகளை வெளியிட்டுள்ளன என்றும், சில மலைப்பகுதிகளில் தண்ணீர் தாங்கிகள் பயன்படுத்தப்பட வேண்டிய நிலை ஏற்பட்டுள்ளது என்றும் சிரியோ மேலும் விளக்கினார்.
விவசாயப் பயன்பாட்டிற்கான நீர் விநியோகத்தை அதிகரிக்குமாறு ஆஸ்டா பள்ளத்தாக்குப் பகுதிக்கும் விண்ணப்பிக்க பியட்மாண்ட் பிராந்திய அரசாங்கம் திட்டமிட்டுள்ளது.
செவ்வாய்க்கிழமை பிற்பகல் நிலவரப்படி, பியட்மாண்ட்டிடமிருந்து டிசினோ அரசாங்கத்திற்கு இதுவரை எந்த அதிகாரப்பூர்வ கோரிக்கையும் வரவில்லை என, ஒரு விசாரணைக்கு பதிலளித்த அரசாங்க செய்தித் தொடர்பாளர் தெரிவித்தார்.
போ நதிப் படுகையில் ஜூன் மாத சராசரி மழைப்பொழிவு, 1991 முதல் 2020 வரையிலான ஆண்டுகளின் வரலாற்று மாத சராசரியை விட 36% குறைவாக இருந்தது.
இதற்கு மாறாக, வெப்பநிலை சராசரியை விட 3.5°C அதிகமாக இருந்தது. அலெஸாண்ட்ரியாவுக்கு அருகிலுள்ள இசோலா சாண்ட்’அன்டோனியோவில், போ நதியின் சராசரி நீர் ஓட்ட விகிதம் வரலாற்று சராசரியை விட 75% குறைவாகப் பதிவானது.
மூலம்- swissinfo
