பொன்ட்ரெசினா அருகே உள்ள வால் ரோசெக் என்ற இடத்தில், நேற்று குதிரை வண்டி சம்பந்தப்பட்ட விபத்தில் 73 வயது மூதாட்டி ஒருவர் உயிரிழந்தார். மேலும், இருவர் படுகாயமடைந்ததுடன்,10 பேர் காயமடைந்தனர்.
தென்கிழக்கு சுவிட்சர்லாந்தில் உள்ள அப்பர் எங்கடைன் பள்ளத்தாக்கில் சுற்றுலா சென்றுவிட்டு, 40 சுற்றுலாப் பயணிகள் குதிரை வண்டியில் பொன்ட்ரெசினாவுக்குத் திரும்பிக் கொண்டிருந்த போது இந்த விபத்து நிகழ்ந்தது.
அந்த குழுவில் இரண்டு குதிரை வண்டிகள் இருந்ததாக ராய்டியன் மாகாண காவல்துறை இன்று தெரிவித்துள்ளது.
ஒரு சரிவான சாலையில், ஓட்டுநர்களில் ஒருவர் வண்டியின் பிரேக் சக்தி போதுமானதாக இல்லை என்பதை உணர்ந்தார். அவர் அதன் வேகத்தைக் குறைப்பதற்காக மூன்று குதிரைகள் பூட்டிய வண்டியை சமதளப் பகுதிக்குத் திருப்ப முயன்றார், அவ்வாறு செய்தபோது குதிரைகளில் ஒன்று கீழே விழுந்ததால், ஓட்டுநர் வண்டியின் கட்டுப்பாட்டை இழந்தார்.
பின்னர், முன்னால் சென்ற வண்டி சாலையின் அருகே இருந்த ஒரு மரத்தில் பலமாக மோதியதில், பல பயணிகள் வண்டியிலிருந்து தூக்கி வீசப்பட்டனர். 73 வயது மூதாட்டி ஒருவர் படுகாயமடைந்து சம்பவ இடத்திலேயே உயிரிழந்தார்.
காயமடைந்த மற்றவர்கள் மூன்று ஹெலிகொப்டர்கள் மற்றும் நான்கு அம்புலன்ஸ்கள் மூலம் அருகிலுள்ள மருத்துவமனைகளுக்குக் கொண்டு செல்லப்பட்டனர்.
சுற்றுலாக் குழுவில் காயமடையாத உறுப்பினர்கள் பொன்ட்ரெசினாவில் ஆதரவுக் குழுக்களால் கவனிக்கப்பட்டனர். மாகாண காவல்துறையின்படி, அந்தக் குழுவில் உள்ள 40 உறுப்பினர்களும் சுவிட்சர்லாந்து நாட்டவர்கள் ஆவர்.
அரசு வழக்கறிஞர் அலுவலகம், மாகாண காவல்துறையுடன் இணைந்து இந்த விபத்து குறித்து விசாரித்து வருகிறது.
மூலம்- swissinfo
