இந்தோனேசியாவின் பாலியின் புனிதமான மௌன தினத்தை அவமதித்ததற்காக ஒரு சுவிஸ் சுற்றுலா பயணிக்கு பாலியில் உள்ள நீதிமன்றம், ஓராண்டு சிறைத்தண்டனை விதித்துள்ளது.
26 வயதான அந்த சுற்றுலா பயணி, சுற்றுலாத் தீவில் அனுசரிக்கப்படும் இந்து மத விடுமுறை நாள் குறித்து சமூக ஊடகங்களில் செய்திகளைப் பதிவிட்டதன் மூலம் இந்தோனேசியாவின் புதிய குற்றவியல் சட்டத்தை மீறியதாகக் குற்றவாளி எனக் கண்டறியப்பட்டார்.
இந்த நாளில் மக்கள் வீட்டிலேயே இருக்க வேண்டும் என்றும், மௌனமாக இருந்து தியானம் செய்யுமாறும் அறிவுறுத்தப்படுகிறார்கள்.
அவர் தங்கியிருந்த வில்லாவின் ஊழியர்கள் கட்டுப்பாடுகள் குறித்து அவருக்குத் தெரிவித்த பின்னரும் கூட, அவர் அந்தச் செய்திகளைப் பதிவிட்டதாக டென்பசார் மாவட்ட நீதிமன்றம் தீர்மானித்தது.
“குற்றம் சாட்டப்பட்டவர் செய்த செயல் பாலி மக்களைப் புண்படுத்தியது, அவர்களின் நம்பிக்கையைக் காயப்படுத்தியது மற்றும் பொதுமக்களிடையே சீற்றத்தைத் தூண்டியது, குற்றம் சாட்டப்பட்டவர் தனது செயல்களுக்குப் பொறுப்பேற்க வேண்டும்.”என்று தலைமை நீதிபதி ஜோகோர்டா புத்ரா புடி பாஸ்டிமா கூறியதாக அசோசியேட்டட் பிரஸ் (AP) செய்தி வெளியிட்டுள்ளது.
இந்த ஆண்டு மௌன தினம் அல்லது “நியேபி” மார்ச் மாதத்தில் வந்தது. இந்த நாளில், மௌனம் கடைப்பிடிக்கப்படுவதை உறுதி செய்யும் பொறுப்பில் உள்ளவர்களைத் தவிர, தீவின் கடற்கரைகளும் தெருக்களும் வெறிச்சோடி காணப்படும்.
முஸ்லிம்கள் பெரும்பான்மையாக வாழும் இந்தோனேசியாவில் உள்ள, பெரும்பாலும் இந்துக்கள் வசிக்கும் தீவான பாலியில் உள்ள விமான நிலையம் மூடப்பட்டு, இணையமும் துண்டிக்கப்படுகிறது. மதம் அல்லது தேசியம் பாராமல் அனைவருக்கும் இந்தக் கட்டுப்பாடுகள் பொருந்தும்.
AP செய்திகளின்படி, குடியிருப்பாளர்களும் பார்வையாளர்களும் அவசரத் தேவைகளைத் தவிர தங்கள் வீடுகளையோ அல்லது தங்குமிடங்களையோ விட்டு வெளியேறத் தடை விதிக்கும் கட்டுப்பாடுகளை மீறியதாக அந்த சுவிஸ் நாட்டவர் இன்ஸ்டாகிராம் பதிவுகளில் பெருமையடித்துக் கொண்டார்.
இணையத்தில் பகிரப்பட்ட காணொளிக் காட்சிகளில், அவர் கேமராவைப் பார்த்துப் புன்னகைத்து, அந்த அனுசரிப்பின் போது ஒரு கடற்கரைக்கு நடந்து சென்றதை விவரித்தார். ஒன்றில், அவர் அந்தப் பாரம்பரியத்தை “பைத்தியக்காரத்தனம்” என்று அழைத்ததோடு, ஒரு கெட்ட வார்த்தையையும் பயன்படுத்தினார்.
இந்தப் பதிவுகள் அவமரியாதையானவை எனக் கருதிய பாலி குடியிருப்பாளர்களிடமிருந்து கண்டனத்தைத் தூண்டின. பொதுமக்களின் புகார்களைத் தொடர்ந்து அதிகாரிகள் அவரைக் கண்டுபிடித்து, குட்டா கடற்கரைக்கு அருகிலுள்ள ஒரு பிரபலமான சுற்றுலாத் தலத்தில் கைது செய்யப்பட்டதாக AP செய்தி நிறுவனம் தெரிவித்துள்ளது.
மூலம்- swissinfo
