2006-ஆம் ஆண்டு முதல் சுவிஸ் இராணுவ வீரர்களின் உடல் தகுதி குறைந்துள்ளதாக ஒரு ஆய்வில் தெரியவந்துள்ளது. இருப்பினும், தாங்கள் முன்னெப்போதையும் விட சிறந்த உடல் தகுதியுடன் இருப்பதாகவே வீரர்கள் கருதுகின்றனர்.
2000-களின் நடுப்பகுதி முதல், இராணுவத்தின் உடல் தகுதிச் சோதனையில் புதிய வீரர்கள் பெறும் சராசரி மதிப்பெண்கள் 74.2-லிருந்து 70.4-ஆகக் குறைந்துள்ளதாக, கூட்டாட்சி விளையாட்டுத் துறை அலுவலகம் செவ்வாய்க்கிழமை வெளியிட்ட செய்திக்குறிப்பில் தெரிவித்துள்ளது.
அதேவேளையில், தங்களை நல்ல உடல் தகுதியுடன் இருப்பதாகக் கருதும் வீரர்களின் வீதம் அதிகரித்துள்ளது. 2006 மற்றும் 2024-க்கு இடைப்பட்ட காலத்தில் இந்த வீதம் 40%-லிருந்து 56%-ஆக உயர்ந்துள்ளது.
பெண் வீராங்கனைகளிடையேயும் இந்த வீதம் 50%-லிருந்து 64%-ஆக உயர்ந்துள்ளது. பெண் வீராங்கனைகளின் உடல் தகுதிச் சோதனை முடிவுகள் மேம்பட்டுள்ளதால், இது இயல்பான ஒன்றே. அவர்களது சராசரி மதிப்பெண் 45.4-லிருந்து 49.9-ஆக அதிகரித்துள்ளது.
“தங்களைத்தாங்களே மதிப்பிடும்போது, அனைவரும் தங்கள் செயல்பாட்டை மிகைப்படுத்திக் காட்டும் இயல்புடையவர்கள்,” என்று கூட்டாட்சி விளையாட்டுத் துறை அலுவலகம் கூறியது.
மேலும், தற்போது பிரபலமாக உள்ள விளையாட்டு நடவடிக்கைகள், இராணுவத்தின் உடல் தகுதிச் சோதனைக்குத் தேவையான குறிப்பிட்ட திறன்களை வளர்ப்பதை நோக்கமாகக் கொண்டிருக்கவில்லை என்றும் அது குறிப்பிட்டது.
சுமார் 20 ஆண்டுகால அளவில், 7 இலட்சம் இராணுவ வீரர்களின் தரவுகளை இந்த கூட்டாட்சி அலுவலகம் ஆய்வு செய்துள்ளது. இந்த ஆய்வில் மாக்லிங்கனில் உள்ள சுவிஸ் கூட்டாட்சி விளையாட்டு நிறுவனம், சுவிஸ் ஆயுதப் படைகள் மற்றும் சூரிச் பல்கலைக்கழகம் ஆகியவை பங்கேற்றன.
இளைஞர்களின் உடல் தகுதியை புறநிலை அளவீடுகள் மூலம் ஆராயும் ஐரோப்பாவின் மிகப்பெரிய நீண்டகால ஆய்வுகளில் ஒன்றாக இது கருதப்படுகிறது.
மூலம்- swissinfo
