ஸ்டாட்லர் ரெயில் உள்ளிட்ட பல நிறுவனங்கள் மீதான ரான்சம்வேர் தாக்குதல்களில் ஈடுபட்டதற்காக, உக்ரைனைச் சேர்ந்த ஒரு தகவல் தொழில்நுட்ப நிபுணருக்கு சூரிச்சில் 12 ஆண்டுகள் மற்றும் ஒன்பது மாதங்கள் சிறைத்தண்டனையும், பத்து ஆண்டுகளுக்கு சுவிட்சர்லாந்திற்குள் நுழையத் தடையும் விதிக்கப்பட்டது.
அரசுத் தரப்பு வழக்கறிஞர்கள், இந்தத் தாக்குதலால் ஏற்பட்ட சேதத்தின் மதிப்பை சுமார் 100 மில்லியன் பிராங் ($123 மில்லியன்) என மதிப்பிட்டுள்ளனர்.
வியாழக்கிழமை வழங்கப்பட்ட தீர்ப்பில், 52 வயதான அந்தத் தகவல் தொழில்நுட்ப நிபுணருக்கு பன்னிரண்டு ஆண்டுகள் சிறைத்தண்டனை கோரியிருந்த அரசுத் தரப்பை விட சூரிச் மாவட்ட நீதிமன்றம் ஒரு படி மேலே சென்றுள்ளது.
பாசல் கவுன்டி என்ற கண்டோனில் வசித்து வந்த அந்த நபர், ஒக்டோபர் 2021 முதல் விசாரணைக்கு முந்தைய தடுப்புக் காவலில் இருந்து வருகிறார்.
பணம் பறிக்கும் நோக்கத்தில், ஸ்டாட்லர் ரெயில், மேயர் டோப்லர் மற்றும் கிரியாலாஜிக்ஸ் போன்ற நிறுவனங்களுக்கு எதிரான இணையவழித் தாக்குதல்களில் பிரதிவாதி முக்கியப் பங்கு வகித்ததாக நீதிமன்றம் கண்டறிந்தது.
இலக்கு வைக்கப்பட்ட நிறுவனங்களுக்குச் சொந்தமான தரவுகளை மறைகுறியாக்கம் செய்யப் பயன்படுத்தப்பட்ட லாக்கர்கோகா, மெகாகார்டெக்ஸ் மற்றும் நெஃபிலிம் ஆகிய மல்வேர் நிரல்களின் முதன்மை உருவாக்குநராக அவர் கருதப்படுகிறார்.
ஸ்டாட்லர் ரெயில் மீதான தாக்குதலின் போது, பிரதிவாதி சுமார் 500 ஜிகாபைட் இரகசியத் தரவுகளைத் திருடி, அவற்றை இணையத்தில் வெளியிடுவதாக மிரட்டினார். ஸ்டாட்லர் ரெயில் கோரப்பட்ட மீட்புத்தொகையைச் செலுத்த மறுத்தது. இருப்பினும், மற்ற நிறுவனங்கள் அதை ஏற்றுக்கொண்டன. மொத்தத்தில், ஏற்பட்ட இழப்புகள் 100 மில்லியன் பிராங் என மதிப்பிடப்பட்டுள்ளது.
இந்தச் செயல்பாடுகளுக்கு உக்ரேனியர் மூளையாகச் செயல்படவில்லை என்றும், ஆனால் அவர் தீம்பொருளை உருவாக்கி, அடையாளம் தெரியாத தூண்டுபவர்களிடம் ஒப்படைத்தார் என்றும் நீதிபதி கூறினார்.
இந்த நபர்கள் பின்னர் சுவிட்சர்லாந்து மற்றும் வெளிநாடுகளில் உள்ள நிறுவனங்களைக் குறிவைத்து, மிரட்டிப் பணம் பறிக்கும் முயற்சிகளை ஒருங்கிணைத்தனர்.
தனது மென்பொருள் குற்றச்செயல்களுக்குப் பயன்படுத்தப்பட்டது பற்றி தனக்குத் தெரியாது என்று பிரதிவாதி தொடர்ந்து மறுத்து வருகிறார்.
தகவல் தொழில்நுட்பப் பாதுகாப்புத் துறையில் அடையாளம் தெரியாத ஒரு வாடிக்கையாளருக்கு ஆலோசகராகப் பணியாற்றி வந்ததாகவும், அதனால்தான் மூலக் குறியீடுகள் (source codes) தனது வீட்டில் கண்டெடுக்கப்பட்டதாகவும் அவர் வாதிட்டார்.
ஆனால், அவரது தரவுகளில் மிரட்டிப் பணம் பறிக்கும் செய்திகளும் கண்டெடுக்கப்பட்டதால், நீதிமன்றம் அவரை நம்பவில்லை.
ஓகஸ்ட் மாதம் நடந்த விசாரணையின் போது, அரசுத் தரப்பின் சில வெளிப்படுத்தல்கள் பரபரப்பை ஏற்படுத்தின.
குற்றம் சாட்டப்பட்டவரின் தூண்டுதலாகக் கூறப்படும் நபர், நவம்பர் 2022-ல் மொஸ்கோவில் ஒரு ஜன்னலிலிருந்து விழுந்து இறப்பதற்கு முன்ன்னர் ரஷ்ய உளவுத்துறையுடன் ஒத்துழைத்ததாகக் கூறப்படுகிறது.
அவர் ஒரு உக்ரேனிய ஹேக்கர் என்றும், அவரைப் பிடிக்க அமெரிக்கா சன்மானம் வழங்கியிருந்ததாகவும், மேலும் அவர் ரஷ்ய உளவுத்துறையால் வழங்கப்பட்ட ஒரு போலி அடையாளத்தைப் பயன்படுத்தி வந்ததாகவும் கூறப்படுகிறது.
மேற்கத்திய நாடுகளில் குழப்பத்தை விதைத்து, பொருளாதார சேதத்தை ஏற்படுத்தும் ரஷ்யாவின் உத்தியுடன் இந்த இணையவழித் தாக்குதல்களை அரசுத் தரப்பு வழக்கறிஞர் தொடர்புபடுத்தினார்.
இந்த விஷயத்தில் குற்றவியல் ஹேக்கர்கள் மற்றும் அரசுத் தரப்பினரின் நலன்கள் ஒன்றுடன் ஒன்று பொருந்துகின்றன. மொஸ்கோ இத்தகைய நடவடிக்கைகளைப் பொறுத்துக்கொள்கிறது, அல்லது ஊக்குவிக்கிறது என்றும் அவர் வாதிட்டார்.
ஆனால், பிரதிவாதிக்கு ரஷ்ய உளவுத்துறையுடன் நேரடித் தொடர்புகள் இருந்தன என்பதற்கு எந்த ஆதாரமும் இல்லை.
பாதுகாப்பு வழக்கறிஞர் தனது கட்சிக்காரரை முழுமையாக விடுவிக்கவும், தவறான தடுப்புக்காவலுக்காக இழப்பீடு வழங்கவும் கோரினார்.
அவரது பார்வையில், சோதனைகளின் போது, தரவுகளை முத்திரையிடுவதற்கான தனது உரிமை குறித்து பிரதிவாதிக்கு போதுமான அளவு தெரிவிக்கப்படாததால், கைப்பற்றப்பட்ட அனைத்து தரவு சேமிப்பு ஊடகங்களும் ஏற்றுக்கொள்ள முடியாதவை என அறிவிக்கப்பட வேண்டும்.
மூலம்- swissinfo
