அதிகம் பரவக் கூடிய என்சூடிக் நிமோனியா நோய் பரவியதைத் தொடர்ந்து, சுவிட்சர்லாந்து முழுவதும் 10,500-க்கும் மேற்பட்ட விலங்குகள் அழிக்கப்பட்டு வருகின்றன.
இந்த நோய், 14 மாகாணங்களில் உள்ள 60 இனப்பெருக்கம் மற்றும் இறைச்சிப் பண்ணைகளைப் பாதித்துள்ளது.
பல மாகாணங்களில் பரவியுள்ள பன்றிப் பண்ணைகளின் ஒரு பெரிய வலையமைப்பில் செப்ரெம்பர் 9 ஆம் திகதி என்சூடிக் நிமோனியா நோய் பரவல் கண்டறியப்பட்டதாக லூசெர்ன் மாகாண கால்நடை மருத்துவ சேவை செவ்வாயன்று தெரிவித்தது.
நோய் பரவுவதைத் தடுக்கும் முயற்சியாக, ஆறு மாகாணங்களில் உள்ள 20 பண்ணைகளை முழுமையாக காலி செய்ய அதிகாரிகள் உத்தரவிட்டுள்ளனர்.
இதுவரை, நாடு முழுவதும் சுமார் 10,500 விலங்குகள் கொல்லப்பட்டுள்ளன அல்லது கருணைக்கொலை செய்யப்பட்டுள்ளன.
14 மாகாணங்களில் உள்ள, பாதிக்கப்பட்ட 40 பன்றி இறைச்சிப் பண்ணைகளில் நடமாட்டக் கட்டுப்பாடுகள் தொடர்ந்து நடைமுறையில் உள்ளன.
லூசெர்ன் மாகாணம் கடுமையாகப் பாதிக்கப்பட்டுள்ளது. அங்குள்ள அதிகாரிகள் 10 இனப்பெருக்கப் பண்ணைகள் மற்றும் ஒரு கொழுத்தப்படும் பண்ணையில் பன்றிகளைக் கொன்றுள்ளனர்; மொத்தம் 5,200 விலங்குகள் கொல்லப்பட்டுள்ளன அல்லது கருணைக்கொலை செய்யப்பட்டுள்ளன.
பெர்ன் மாகாணத்தில், சுமார் 1,700 விலங்குகளைக் கொண்ட மூன்று இனப்பெருக்கப் பண்ணைகள் பாதிக்கப்பட்டுள்ளன.
வாட் மாகாணத்தில், பாதிக்கப்பட்ட ஒரு பண்ணையில் 950 பன்றிகள் கொல்லப்பட்டன.
பாதிக்கப்பட்ட 14 மாகாணங்களில், பிரெஞ்சு மொழி பேசும் சுவிட்சர்லாந்தில் உள்ள நியூசாடெல் மற்றும் வாலெய்ஸ் ஆகியவையும் அடங்கும்.
நோய் பரவும் அபாயத்தைக் கண்டறிய ஒவ்வொரு பண்ணையும் தனித்தனியாக மதிப்பிடப்படுகிறது. மாகாண கால்நடை மருத்துவர்கள் அருகிலுள்ள பண்ணைகளுக்குச் சென்று அங்கு வளர்க்கப்படும் பன்றிகளின் ஆரோக்கியத்தையும் பரிசோதித்து வருகின்றனர்.
இதுவரை, பாதிக்கப்பட்ட பகுதிக்கு வெளியே உள்ள எந்தப் பண்ணைகளிலும் தொற்று ஏற்பட்டதற்கான அறிகுறி எதுவும் இல்லை.
தொற்று இல்லை என்பது உறுதி செய்யப்படும் வரை அல்லது மந்தையில் இருந்து தொற்று நீக்கப்படும் வரை விலங்குகளின் நடமாட்டத்திற்கான கட்டுப்பாடுகள் தொடரும்.
அதிகாரிகளின் உத்தரவின் பேரில் கால்நடைகள் அழிக்கப்படும் விவசாயிகளுக்கு அவர்களின் இழப்புகளுக்கு இழப்பீடு வழங்கப்படும்.
பன்றி வளர்ப்போர் விழிப்புடன் இருக்குமாறும், உயிரியல் பாதுகாப்பு நடவடிக்கைகளைக் கடுமையாகப் பின்பற்றுமாறும் அதிகாரிகள் வலியுறுத்துகின்றனர்.
இந்த நோய் பன்றிகளைப் பாதிக்கிறது, ஆனால் மனிதர்களுக்கு எந்த ஆபத்தையும் ஏற்படுத்தாது. பன்றி இறைச்சியை உண்பதாலும் எந்த ஆபத்தும் இல்லை.
மூலம்- swissinfo
