நீண்ட தூர வான் பாதுகாப்பு அமைப்புகளான இஸ்ரேலின் ‘பாரக் எம்எக்ஸ்’ (Barak MX) மற்றும் பிரான்சின் ‘சாம்ப்/டி என்ஜி’ (SAMP/T NG) ஆகியவற்றை மதிப்பீடு செய்யுமாறு பாதுகாப்பு அமைச்சு பணிக்கப்பட்டுள்ளதாக சுவிட்சர்லாந்தின் அரசு புதன்கிழமை தெரிவித்துள்ளது.
அமெரிக்க தயாரிப்பான ‘பட்ரியாட்’ (Patriot) பாதுகாப்பு அமைப்புடன் கூடுதலாக, இந்த அமைப்புகளில் ஒன்றைச் சேர்ப்பதற்கான சாத்தியக்கூறுகள் குறித்து இந்த மதிப்பீடு மேற்கொள்ளப்படவுள்ளது.
நான்கு உற்பத்தியாளர்கள் சமர்ப்பித்த ஏல விண்ணப்பங்களை ஆய்வு செய்த பிறகு, சுவிஸ் கூட்டாட்சி கவுன்சில் (Federal Council) இந்த அறிவிப்பை வெளியிட்டது.
தற்போதைய புவிசார் அரசியல் சூழல் மோசமடைந்து வரும் நிலையில், அமெரிக்க தயாரிப்பான ‘பட்ரியாட்’ அமைப்புடன் கூடுதலாக மற்றொரு வான் பாதுகாப்பு அமைப்பை விரைவாகக் கொள்முதல் செய்வது அவசியமென அரசு தெரிவித்துள்ளது.
இது, பாதுகாக்கும் பரப்பளவை அதிகரிப்பதோடு, ஒரே ஒரு விநியோகஸ்தர் அல்லது விநியோகச் சங்கிலியை மட்டுமே சார்ந்திருக்கும் நிலையைக் குறைக்கவும் உதவும்.
நீண்ட தூர வான் பாதுகாப்பு அமைப்புகள், குறுகிய மற்றும் நடுத்தர தூர பாதுகாப்பு அமைப்புகள் மற்றும் போர் விமானங்களுடன் இணைந்து செயல்படும்போது, நீண்ட தூரத் தாக்குதல்களையும் ஏவுகணைத் தாக்குதல்களையும் (ballistic missiles) எதிர்கொள்ளும் திறன் கொண்டவை என்று அரசு குறிப்பிட்டுள்ளது.
எதிர்கால நடவடிக்கைகளின் போது, பிற அரசுத் துறைகளுடன் இணைந்து, வெளியுறவுக் கொள்கை மற்றும் பொருளாதாரக் கொள்கை சார்ந்த அம்சங்களையும் கருத்தில் கொள்ளுமாறு பாதுகாப்பு அமைச்சகத்திற்கு அறிவுறுத்தப்பட்டுள்ளது.
அரசு வெளியிட்டுள்ள செய்திக்குறிப்பில், ‘பட்ரியாட்’ அமைப்புகளை வழங்குவதில், உக்ரைனுக்குத் தங்கள் சொந்த பாதுகாப்பு அமைப்புகளை வழங்கி உதவிய நாடுகளுக்கு அமெரிக்கா முன்னுரிமை அளித்துள்ளதாகக் குறிப்பிடப்பட்டுள்ளது.
இருப்பினும், மாற்று ஏற்பாடு ஏதுமின்றி இந்த கொள்முதல் செயல்முறையை நிறுத்தி வைப்பது நடைமுறைக்குச் சாத்தியமற்றது என்று அரசு கருதுகிறது.
எனவே, பாதுகாப்பு அமைச்சு இந்தத் திட்டத்தை எவ்விதத் தாமதமும் இன்றி, கூடுதல் செலவுகளைக் கூடியவரை குறைத்து முன்னெடுத்துச் செல்லும்.
நாட்டின் பாதுகாப்பை வலுப்படுத்த, கூடுதலாக 24 பில்லியன் சுவிஸ் பிராங்குகளை (CHF) ஒதுக்குவது தொடர்பான இராணுவ நிதி குறித்த முன்மொழிவு, நாடாளுமன்றத்தின் குளிர்காலக் கூட்டத்தொடரில் விவாதிக்கப்பட வாய்ப்புள்ளது.
இந்தத் தொகையில், கூடுதல் நீண்ட தூர வான் பாதுகாப்பு அமைப்பிற்காக 6 பில்லியன் சுவிஸ் பிராங்குகளும், ‘பட்ரியாட்’ அமைப்பைக் கொள்முதல் செய்வதால் ஏற்படும் கூடுதல் செலவுகளின் ஒரு பகுதியை ஈடுகட்டத் தேவையான நிதியும் அடங்கும். இந்த முடிவு, இச்செயல்முறையின் அடுத்தகட்ட நடவடிக்கைகளைத் தீர்மானிக்கும் காரணியாக அமையும்.
மூலம்- swissinfo
