லைபீரியாவின் முன்னாள் கிளர்ச்சித் தளபதி அலீயு கோசியாவுக்கு விதிக்கப்பட்ட 20 ஆண்டு சிறைத்தண்டனையை சுவிட்சர்லாந்தின் கூட்டாட்சி உச்சநீதிமன்றம் உறுதிப்படுத்தியுள்ளது.
மனிதகுலத்திற்கு எதிரான குற்றச்சாட்டுகளிலிருந்து அவரை நீதிமன்றம் விடுவித்தாலும், போர்க்குற்றங்களுக்கான தண்டனை அப்படியே நீடிக்கிறது.
வெள்ளிக்கிழமையன்று வெளியிடப்பட்ட தீர்ப்பில், 1993 முதல் 1995 வரை மேற்கு ஆபிரிக்க நாடான லைபீரியாவில் உள்நாட்டுப் போர் நடந்தபோது கோசியா செய்த செயல்களை, ‘மனிதகுலத்திற்கு எதிரான குற்றங்கள்’ என்று வகைப்படுத்த முடியுமா என்பதை கூட்டாட்சி உச்ச நீதிமன்றம் ஆய்வு செய்தது.
சுவிட்சர்லாந்து தனது குற்றவியல் சட்டத்தில் இக்குற்றத்தை 2011-ஆம் ஆண்டுதான் இணைத்தது.
சட்டத்தை அதன் காலத்திற்கு முந்தைய நிகழ்வுகளுக்குப் பயன்படுத்துவது, ‘சட்டப்படி மட்டுமே தண்டனை வழங்கப்பட வேண்டும்’ (principle of legality) என்ற கொள்கைக்கு முரணானது என்று நீதிபதிகள் தீர்ப்பளித்தனர். எனவே, இந்தக் குற்றச்சாட்டிலிருந்து கோசியாவை நீதிமன்றம் விடுவித்தது.
இருப்பினும், பிற குற்றச்சாட்டுகளுக்கான தண்டனைகளை நீதிமன்றம் உறுதிப்படுத்தியது. இதில் சிறுவர்களைப் படையில் சேர்த்தல், கொலை, பாலியல் வன்கொடுமை மற்றும் கல்லறைகளை அவமதித்தல் போன்ற போர்க்குற்றங்கள் அடங்கும்.
தற்போது 51 வயதாகும் கோசியா, 2014-ஆம் ஆண்டு சுவிட்சர்லாந்தில் கைது செய்யப்பட்டார்.
மூலம்- swissinfo
