சூரிச்சிற்கும் ஹொங்கொங்கிற்கும் இடையே பயணம் செய்பவர்கள் தங்கள் மதிப்புமிக்க பொருட்களைக் கவனமாகக் கண்காணிக்க வேண்டும்.
“ஏரோ டெலிகிராஃப்” என்ற விமானப் போக்குவரத்து இணையதளத்தின்படி, அண்மைய மாதங்களில் இந்த வழித்தடத்தில் கைப்பெட்டிகளிலிருந்து தொடர்ச்சியான திருட்டுகள் நடந்துள்ளன.
விமானத்தின் விளக்குகள் அணைக்கப்பட்டு, பல பயணிகள் உறங்கிக் கொண்டிருக்கும் இரவு நேரங்களில், குற்றவாளிகள் முக்கியமாகத் திருட்டில் ஈடுபட்டதாக நம்பப்படுகிறது.
ஸ்விஸ் நிறுவனம் இது போன்ற தனிப்பட்ட சம்பவங்களை உறுதி செய்துள்ளது.
மொத்த விமானப் பயணங்களின் எண்ணிக்கையுடன் ஒப்பிடும்போது இவை “மிகவும் அரிதானவை” என்று விமான நிறுவனத்தின் செய்தித் தொடர்பாளர், கூறினார்.
ஸ்விஸ் நிறுவனம் துல்லியமான புள்ளிவிவரங்களை வழங்கவில்லை. இருப்பினும், விமான நிறுவனம் நடவடிக்கை எடுத்து வருகிறது.
சமீபத்தில் அதிகரித்துள்ள திருட்டுச் சம்பவங்கள் குறித்து விமானப் பணியாளர்களை அது எச்சரித்துள்ளது. பணியாளர்கள் தங்களின் சொந்தப் பயணப் பெட்டிகளையும் மதிப்புமிக்க பொருட்களையும் முடிந்தவரை பூட்டக்கூடிய சேமிப்புப் பெட்டிகளில் வைக்குமாறு அறிவுறுத்தப்பட்டுள்ளனர்.
மேலும், ஹொங்கொங் வழித்தடத்தில் உள்ள பணியாளர்களுக்கு, சந்தேகத்திற்கிடமான எதையும் தெரிவிக்க சிறப்புப் பயிற்சி அளிக்கப்படுகிறது.
“அறிவிக்கப்பட்ட சம்பவங்கள் குறித்து, நாங்கள் சேருமிடத்தில் உள்ள அதிகாரிகளுக்குத் தெரிவிக்கிறோம். இதன் மூலம், அவர்கள் சென்றடைந்தவுடன் விசாரணை நடத்தப்பட்டு, தேவைப்பட்டால் சந்தேக நபர்கள் கைது செய்யப்படலாம்,” என்று ஸ்விஸ் செய்தித் தொடர்பாளர் கூறுகிறார்.
பயணிகளுக்கும் எச்சரிக்கை விடுக்கப்பட்டுள்ளது. சூரிச் மற்றும் ஹொங்கொங் இடையேயான விமானப் பயணங்களில், பயணிகள் தங்களின் மதிப்புமிக்க பொருட்களைத் தங்களுடன் வைத்துக் கொள்ளுமாறும், அவற்றை மேல்நிலை பெட்டிகளில் வைக்க வேண்டாம் என்றும் ஸ்விஸ் நிறுவனம் வழக்கமாக விமானத்தின் உள்ளே அறிவிப்புகளை வெளியிடுகிறது.
லுஃப்தான்சா குழுமம் தற்போது தனது முழு வழித்தட வலையமைப்பிலும் எந்தப் பிரச்சினையையும் காணவில்லை. இதுபோன்ற சம்பவங்கள் அதிகரிப்பதை தாங்கள் கவனிக்கவில்லை என்று ஒரு செய்தித் தொடர்பாளர் கூறினார்.
மூலம்- swissinfo
