சராசரி மழையளவில் பாதிக்கும் சற்று அதிகமாகப் பெய்ததால், 1901-ல் பதிவுகள் தொடங்கப்பட்டதிலிருந்து சுவிட்சர்லாந்தில் ஏப்ரல் முதல் ஜூலை வரையிலான காலகட்டம், இதுவரை இல்லாத அளவுக்கு மிகவும் வெப்பமான மற்றும் வறண்ட காலமாகப் பதிவாகியுள்ளது.
சுற்றுச்சூழல் அமைச்சு மற்றும் சுவிஸ் கூட்டாட்சி வன, பனி மற்றும் நிலப்பரப்பு ஆராய்ச்சி நிறுவனத்துடன் (WSL) இணைந்து, மெட்டியோஸ்விஸ் இன்று இந்தத் தகவலை வெளியிட்டது.
தேசிய சராசரி வெப்பநிலை, 1991-2020 சராசரியை விட 2.7°C அதிகமாக இருந்தது.
இதற்கிடையில், மழைப்பொழிவு இயல்பான அளவில் 54% மட்டுமே எட்டியது. ஜூரா பிராந்தியத்தில் (45%) மற்றும் சுவிஸ் பீடபூமியில் (47%) இதைவிடக் குறைந்த அளவே பதிவாகியுள்ளது.
உதாரணமாக, ஐரோலோ நகராட்சியில், சராசரியாக 775 மி.மீ மழை பெய்ய வேண்டிய நிலையில், வெறும் 341 மி.மீ மழையே பெய்தது.
ஏப்ரல் 1 முதல் ஆகஸ்ட் 24 வரை, நாட்டின் 408 கண்காணிப்பு நிலையங்களில் 139 நிலையங்களில் சாதனை அளவிலான மழைப்பொழிவு பற்றாக்குறை பதிவாகியுள்ளது.
எனவே, பல ஏரிகளிலும் ரைன் நதியிலும் நீர் மட்டம் சராசரியை விட மிகவும் குறைவாக இருந்தது. இருப்பினும், ஆல்ப்ஸ் மலைத்தொடர் முழுவதும், மழைப்பொழிவின் பற்றாக்குறையை ஈடுசெய்ய பனியாறுகள் உருகுவது உதவியதால், நீர்மட்டம் உயர்ந்த நிலையிலேயே இருந்தது.
குறைந்த நீர்மட்டங்கள் வழக்கத்திற்கு மாறாக அதிக நீர் வெப்பநிலைக்கும் வழிவகுத்துள்ளன. பல நீர்நிலைகளில், 2003 மற்றும் 2018 ஆம் ஆண்டுகளின் அசாதாரணமான வெப்பமான கோடைகாலங்களில் பதிவு செய்யப்பட்ட முந்தைய அதிகபட்ச அளவுகளை விட வெப்பநிலை உயர்ந்தது.
உதாரணமாக, ஜூலை 14 அன்று, பெர்னில் உள்ள ஆரே நதி 24.82°C வெப்பநிலையை எட்டியது, இது ஓகஸ்ட் 4, 2022 அன்று 24.12°C ஆகப் பதிவான முந்தைய சாதனையை முறியடித்தது.
குறைந்த நதி நீரோட்டங்கள், கடுமையான சூரிய ஒளியில் ஓடைகளையும் ஆறுகளையும் விரைவாக வெப்பமடையச் செய்கின்றன, இது பல நீர்வாழ் உயிரினங்களுக்கு அதிக அழுத்தத்தை ஏற்படுத்துகிறது.
2003 ஆம் ஆண்டு முதல், மெட்டியோஸ்விஸ் மற்றும் கூட்டாட்சி தொழில்நுட்ப நிறுவனமான ETH சூரிச்சின் ஆராய்ச்சியாளர்கள், வெப்பமான, வறண்ட வானிலை அதிகரிப்பதைக் கவனித்து வருகின்றனர், மேலும் இதுபோன்ற கோடைகாலங்கள் அடிக்கடி நிகழும் மற்றும் தீவிரமடையும் என்று கணிக்கின்றனர்.
அந்தப் பின்னணியில், இந்த கோடையில் பதிவு செய்யப்பட்டதைப் போன்ற புள்ளிவிவரங்கள் இனி எதிர்பாராதவையாகக் கருதப்படுவதில்லை.
மூலம்- swissinfo
