சுவிட்சர்லாந்தின் தலைநகரான பெர்னில் இன்று போர் மற்றும் அடக்குமுறைக்கு எதிராகப் நூற்றுக்கணக்கான மக்கள் ஆர்ப்பாட்டத்தில் ஈடுபட்டனர்.
இந்த ஈஸ்டர் பேரணி, உலகெங்கிலும் உள்ள வன்முறையால் பாதிக்கப்பட்டவர்களுக்குத் தங்கள் ஆதரவைத் தெரிவித்ததோடு, அமைதிக்கான ஒரு பெரும் அர்ப்பணிப்புக்கும் அழைப்பு விடுத்தது.
முக்கியமாக இடதுசாரி மற்றும் மத வட்டாரங்களைச் சேர்ந்த சுமார் 40 அமைப்புகள் இந்த ஆர்ப்பாட்டத்திற்கு அழைப்பு விடுத்திருந்தன.
பெர்ன் பேரணி ஒவ்வொரு ஆண்டும் ஈஸ்டர் திங்கட்கிழமையன்று, நகரின் புறநகர்ப் பகுதியிலிருந்து பேராலயச் சதுக்கம் வரை நடைபெறுகிறது.
பேரணியில் வானவில் கொடிகள் பறந்தன, மேலும் பலஸ்தீனத்தை அங்கீகரிக்குமாறு சுவிட்சர்லாந்தைக் கோரும் பதாகைகள் இருந்தன.
போர்கள், இனப்படுகொலை, இனச்சுத்திகரிப்பு மற்றும் வன்முறை ஆகியவை நூறாயிரக்கணக்கான மக்களின் உயிர்களைப் பறித்துள்ளன.
இந்த வன்முறைக்கு முன்னால் பலர் தங்களைச் சக்தியற்றவர்களாக உணர்கிறார்கள். நாங்கள் போர் மற்றும் வன்முறையை எதிர்க்கும் ஒரு நீண்ட மக்கள் சங்கிலியின் ஒரு பகுதியாக இருக்கிறோம்.
குண்டுவெடிப்புகள், படுகொலைகள், பஞ்சங்கள் பற்றிய தகவல்களால் நாம் மூழ்கடிக்கப்பட்டுள்ளோம். இவை அனைத்திலும் மிகவும் அச்சமூட்டும் விடயம் வன்முறை அல்ல, மாறாக நாம் அதற்குப் பழகிப்போன வேகம்தான்,” என்று ஃபிரீடா பெண்கள் அமைதி இயக்கத்தின் தலைவர் வர்ஜீனியா கோப்ஃப்லி கூட்டத்தில் உரையாற்றும் போது கூறினார்.
அமைதிப் பணிகள் பெரும்பாலும் வெகுளித்தனமானவை என்று சித்தரிக்கப்படுகின்றன. ஆனால், அதிக ஆயுதங்கள் அமைதியைக் கொண்டுவரும் என்றும், பிரிவினையால் பாதுகாப்பு உறுதி செய்யப்படும் என்றும் நம்புபவர்களே உண்மையான வெகுளிகள், என்றும் அவர் மேலும் கூறினார்.
சுவிட்சர்லாந்தில் 1960-கள் முதல் ஈஸ்டர் பேரணிகள் நடத்தப்பட்டு வருகின்றன. பெர்னில், பனிப்போரின் முடிவில் இந்த பாரம்பரியம் வலுவிழந்தது, ஆனால் ஈராக் மீதான அமெரிக்கப் படையெடுப்பிற்குப் பிறகு 2003-ல் மீண்டும் புத்துயிர் பெற்றது.
மூலம்- swissinfo