தொல்பொருள் ஆராய்ச்சியாளர்கள், வின்டோனிசா (தற்போது விண்டிஷ்) என்ற ரோமானியக் குடியிருப்பில் கருகிய பாண் (bread)எச்சங்களைக் கண்டுபிடித்துள்ளனர்.
புதன்கிழமை ஆர்காவ் மாகாணம் வெளியிட்ட ஒரு செய்திக்குறிப்பின்படி, இந்தக் கண்டுபிடிப்பு மிகவும் அரிதானதாகும். இது ஒரு சிறிய தட்டையான பாண் போல் தெரிகிறது.
பிஸ்கட் போன்ற இந்தக் கண்டுபிடிப்பு, பத்து சென்டிமீட்டர் விட்டமும், சுமார் மூன்று சென்டிமீட்டர் தடிமனும் கொண்டிருந்தது.
அகழ்வாராய்ச்சிக்குப் பின்னர், இது மாகாணத்தின் தொல்பொருள் மறுசீரமைப்பு ஆய்வகத்தில் ஆய்வு செய்யப்பட்டது.
வியன்னாவில் உள்ள ஒரு சிறப்பு ஆய்வகத்தில் செய்யப்படும் மேலதிக அறிவியல் பகுப்பாய்வுகள், அந்த பாணின் உள்ளடக்கத்தை வெளிப்படுத்தும்.
செய்திக்குறிப்பின்படி, ரோமானிய பாம்பேயில் உள்ள பேக்கரியில் கிடைத்த பாணைப் போலவே, ரோமானிய பாண்கள் எரிக்கப்பட்டால் மட்டுமே தப்பிப்பிழைக்கும். எனவே, இந்தக் கண்டுபிடிப்புகள் மிகவும் அரிதானவை.
விண்டிஷில் கிடைத்த ஒரே புதிய கண்டுபிடிப்பு இந்த பாண் மட்டுமல்ல. “இந்த எச்சங்கள், வின்டோனிசாவில் இருந்த மிகப் பழமையான படைவீரர் முகாமுக்கும் அதன் பாதுகாப்பு அமைப்புக்கும் சான்றாக உள்ளன,” என்று அந்தச் செய்திக்குறிப்பு மேலும் கூறுகிறது.
இரண்டு இடங்களில் ஒரு கோட்டைக்கான சான்றுகள் கண்டறியப்பட்டன, அவை “கி.பி. 1 ஆம் நூற்றாண்டின் படைவீரர் முகாமின் நன்கு ஆராயப்பட்ட பாதுகாப்பு அமைப்பை விடப் பழமையானதாக இருக்க வேண்டும்”. தூண்களின் தடயங்களைக் கொண்ட இரண்டு இணையான அகழிகள், ஒரு மர-மண் சுவரின் அமைப்பைக் குறிப்பிட்டன.
கோட்டையின் தெற்கே, ஒரு கூர்முனை அகழியின் அடித்தளம் கண்டுபிடிக்கப்பட்டது. இதன் மூலம், விண்டோனிசாவில் இருந்த முதல் ரோமானிய இராணுவ முகாமின் அளவை இப்போது முதன்முறையாக மதிப்பிட முடிகிறது: அதன் வடக்கு-தெற்கு நீட்சி கிட்டத்தட்ட 400 மீட்டர் என்று கூறப்படுகிறது.
பழைய முகாமின் உள்ளே, ஒரே மாதிரியான அமைப்பில் இரண்டு அறைக் குழுக்களைக் கொண்ட ஒரு கட்டிடம் கண்டுபிடிக்கப்பட்டது. நெருப்பிடம் கொண்ட ஒரு பெரிய அறைக்கு அருகில் இரண்டு சிறிய அறைகள் இருந்தன.
மற்றொரு இடத்தில், இளைய படைவீரர் முகாமின் காலத்தில் நடந்த கைவினை நடவடிக்கைகளுக்கான சான்றுகள் கண்டறியப்பட்டன. மேலும், உலோகக் கருவிகள், இரும்புக் கழிவுகள், ஈட்டி மற்றும் எறிமுனைகள் மற்றும் ஒரு களிமண் சூளை ஆகியவை கண்டெடுக்கப்பட்டன.
விண்டிஷில் சுமார் 4,000 சதுர மீட்டர் பரப்பளவில் ஒரு குடியிருப்புத் திட்டம் திட்டமிடப்பட்டுள்ளது. இந்தக் கட்டுமானத் தளம், விண்டோனிசாவில் உள்ள ரோமானியப் படை முகாமுக்குத் தென்மேற்கே அமைந்துள்ளது.
மாகாணத் தொல்லியல் துறை, 2025 ஆகஸ்ட் மாத நடுப்பகுதியிலிருந்து பதினொரு மாதங்களாக மீட்புப் பணிகளை மேற்கொண்டு வருகிறது. தொல்பொருள் எச்சங்கள் அறிவியல் பூர்வமாக ஆவணப்படுத்தப்படும்.
மூலம்- swissinfo