இன்று அதிகாலை புதுடில்லியில் இருந்து சுவிஸ் நிறுவனத்தின் ஏர்பஸ் A330 ரக விமானம் புறப்பட்டு, வேகமெடுத்த சிறிது நேரத்திலேயே புறப்பாடு ரத்து செய்யப்பட்டுள்ளது.
முன்னெச்சரிக்கை நடவடிக்கையாக விமானத்தில் இருந்தவர்களை வெளியேற்றப்பட்டதை தொடர்ந்து பல பயணிகளுக்கு மருத்துவப் பரிசோதனைகள் தேவைப்பட்டன.
டில்லியிலிருந்து சூரிச் செல்லும் LX147 விமானமே பாதிக்கப்பட்டது. அதிகாலை 1 மணிக்கு பின்னர் விமானத்தின் இயந்திரங்களில் ஒன்றில் கோளாறு ஏற்பட்டது. அதைத் தொடர்ந்து, விமானி குழுவினர் புறப்பாட்டு நடைமுறையை ரத்து செய்து, நிலைமையை மதிப்பிட்ட பிறகு, அவசரகால சரிவுப் பாதைகள் வழியாக வெளியேற்ற முடிவு செய்தனர்.
விமானத்தில் 228 பயணிகளும் நான்கு பச்சிளம் குழந்தைகளும் இருந்தனர். அனைவரும் விமானத்தை விட்டு வெளியேறினர். சுவிஸ் நிறுவனத்தின் தகவல்படி, ஆறு பேருக்கு மருத்துவ உதவி அளிக்கப்பட்டது. விமானக் குழுவினருக்கு எந்தப் பாதிப்பும் ஏற்படவில்லை.
வெளியேற்றத்தின் போது பீதியான நிலை ஏற்பட்டதாகப் பயணிகள் தெரிவிக்கின்றனர்.
“விமானம் புறப்படுவதற்குச் சற்று முன்பு ஒரு பெரிய சத்தம் கேட்டது, அதைத் தொடர்ந்து விமானம் திடீரென பிரேக் பிடித்தது.” சிறிது நேரத்திற்குப் பிறகு வெளியேற்ற உத்தரவு பிறப்பிக்கப்பட்டது என ஒரு பயணி ஒருவர் தெரிவித்துள்ளார்.
மற்ற நேரில் கண்ட சாட்சிகள், ஒரு இயந்திரத்தில் இருந்து தீப்பொறிகள் வருவதைக் கண்டதாகத் தெரிவித்தனர்.
பாதிக்கப்பட்ட பயணிகளுக்கு சம்பவ இடத்திலேயே சிகிச்சை அளிக்கப்பட்டு வருகிறது. விமான நிறுவனம் தற்போது மறு முன்பதிவுகள் மற்றும் ஹோட்டல் தங்குமிடங்களை ஏற்பாடு செய்து வருகிறது.
இந்தச் சம்பவத்தை விசாரிக்கவும், பயணிகளுக்குப் போதுமான ஆதரவு கிடைப்பதை உறுதி செய்யவும் ஒரு பணிக்குழுவும் அமைக்கப்பட்டுள்ளது.
விமானத்தை ஆய்வு செய்ய தொழில்நுட்ப வல்லுநர்கள் டெல்லிக்குச் செல்ல உள்ளனர். உள்ளூர் அதிகாரிகளுடன் நெருங்கிய தொடர்பில் இருப்பதாக ஸ்விஸ் நிறுவனம் தெரிவித்துள்ளது. இந்தச் சம்பவத்திற்கான காரணம் இன்னும் தெளிவாகத் தெரியவில்லை.
மூலம்- 20min