வைரக்குடுவை தொகுதி 02 நூலுக்கு வாழ்த்துரை வழங்கிய வீரகேசரி வார வெளியீடு பத்திரிகையின் பிரதி ஆசிரியர் திருமதி ரேணுகா பிரபாகரன் அவர்கள் இப்படிக் குறிப்பிடுகின்றார். ‘இயந்திரமயமான புலம்பெயர் வாழ் கால ஓட்டத்தில் தனக்கு தனக்கு என தாவியோடும் மனிதர்கள் மத்தியில் ஒவ்வொரு வாரமும் மூலை முடுக்கில் உள்ள ஒவ்வொரு ஆளுமைகளையும் தேடிப்பிடித்து தகவல்களை திரட்டி இவ்வரிய கட்டுரைகளை து.திலக்(கிரி) அவர்கள் தருகின்றார்’ என்று.
உரும்பையூர் என சிறப்பித்துச் சொல்லப்படும் யாழ்ப்பாணம் உரும்பிராயைச் சேர்ந்தவரும் சுவிற்சர்லாந்தில் வசிப்பவருமான ஈழத்துப் படைப்பாளர் து. திலக் (கிரி) அவர்கள் ஈழத்தின் வீரகேசரி பத்திரிகையில் ஒவ்வொரு வாரமும் தொடராக எழுதி வருகின்ற ஆளுமைகள் பற்றிய ஆவணவாக்கல் கட்டுரைகளின் தொகுப்பு நூலாகிய வைரக்குடுவை தொகுதி இரண்டு நூல் வெளியாகியுள்ளது. வைரக்குடுவை நூலில் 25 ஆளுமைகளின் வாழ்க்கை வரலாறு, கலை இலக்கியம் சார்ந்த பதிவுகள் இடம்பிடித்துள்ளன. ஏற்கனவே வைரக்குடுவை தொகுதி ஒன்று வெளியானது. அதன் தொடர்ச்சியே தொகுதி இரண்டு.
வைரக்குடுவை தொகுதி 02 நூலின் வெளியீட்டு விழாவானது ஈழத்தின் யாழ்ப்பாணம் சேர். பொன் இராமநாதன் வீதியில் அமைந்துள்ள ராஜா கிறீம் கவுஸ் கேட்போர் கூடத்தில் இடம்பெற்றது. நிகழ்விற்கு பாடலாசிரியரும் கவிஞருமான ‘கவிராஜராஜன்’ கு.வீரா தலைமை வகித்தார். பிரதம விருந்தினராக வடக்கு மாகாண ஆளுநர் நா.வேதநாயகன் அவர்கள் கலந்து கொண்டார்.
வைரக்குடுவை தொகுதி இரண்டு நூலில் இடம்பெறும் 25 ஆளுமைகளின் அடையாளங்களை தாங்கிய பதாதை நிகழ்வு அரங்கினை அலங்கரிக்க நிகழ்வு மண்டபம் நேர்த்தியாக ஒழுங்கமைக்கப்பட்டிருந்தது. தொடக்க நிகழ்வாக நிகழ்வின் விருந்தினர்கள் மாலை அணிவிக்கப்பட்டு பங்கேற்பாளர்களுடன் இணைந்து வரவேற்கப்பட்டனர். மங்கல விளக்கேற்றலினை தொடர்ந்து மறைந்த கவிஞர் நாவண்ணன் அவர்களுக்கான நினைவு வணக்கம் இடம்பெற்றது. நாவண்ணன் அவர்கள் வைரக்குடுவை தொகுதி 02 நூலில் இடம்பெறும் ஆளுமை ஆவார். நாவண்ணன் அவர்களின் திருவுருவப்படத்திற்கான மலர் மாலையினை குடும்பத்தினர் அணிவித்து மலர் வணக்கம் செய்தனர்.
அகவணக்கம் இடம்பெற்றதனைத் தொடர்ந்து இறைவணக்கப் பாடலை பருத்தித்துறை மெதடிஸ்த பெண்கள் உயர்தரப் பாடசாலை மாணவி அனோலா விஜய் இசைத்தார். தமிழ்மொழி வாழ்த்தினை யாழ்ப்பாணம் இந்துக் கல்லூரி மாணவர்களான திருவருட்செல்வன் திருவர்த்தனன், கோகுலன் சாகித்தியன் ஆகியோர் இசைத்தனர்.
வரவேற்பு நடனத்தினை திருமதி ஜெயரஞ்சனி குயின்ரஸ் அவர்களின் மாணவிகளான ரா.றொபாசி பிராங்கா, டி.டிலக்சனா, இ.சபீனா, ஏ.செரின் ஒலிலியா, லா.கிரின்சிகா, சு.ஏஞ்சலின் ஆகியோர் வழங்கினர். தமிழைப் போற்றிடும் வரவேற்பு நடன பாடலை கு.வீரா அவர்கள் எழுத ஜேர்மன் கண்ணன் பாடியிருந்தார்.
வரவேற்புரையினை நிகழ்வின் ஒழுங்கமைப்பாளர்களுள் ஒருவரான வில்லிசைக் கலைஞர் சு.ஜெயராசசிங்கம் நிகழ்த்தினார். ஆசியுரைகளை சிவஸ்ரீ செந்தில்நாதக் குருக்கள் அவர்களும், அருட்தந்தை ம.போல் நட்சத்திரம் அடிகளார் அவர்களும் வழங்கினர்.
தலைமை உரை நிகழ்த்திய கு.வீரா அவர்கள் வைரக்குடுவை நூலின் முக்கியத்துவத்தினை நான்கு அம்சங்களில் வெளிப்படுத்தி இருந்தார். நவீன தொழினுட்பத்தின் ஆதிக்கம் சூழ்ந்துள்ள இக்காலகட்டத்தில் அச்சாக்க ஆவணத்தின் முக்கியத்துவம் எத்தனை பெரியது என்பதை அவர் தனது உரையில் குறிப்பிட்டார்.
வாழ்த்துரை வழங்கிய கவிஞர் வேலணையூர் சுரேஷ் அவர்கள் ‘புலம்பெயர் வாழ்வியல் சூழல் இறுக்கமானது. அங்கே இடைவேளைகள் அரிது. அந்த இடைவேளைகளை தாயக படைப்பாளர்களுக்காக பயன்படுத்தும் திலக் அவர்களின் செய்கை மேன்மையானது’ என்று குறிப்பிட்டார்.
வாழ்த்துரை வழங்கிய சமூக செயற்பாட்டாளரும் இசையமைப்பாளருமான ஞானவெளிச்சம் வொட்கிட்சன் அவர்கள் ‘வைரக்குடுவை நூல் என்பது வரலாற்று சேமிப்பகம்’ என்றார்.
நூலின் அறிமுக உரையினை ஏர்நிலம் தொண்டமைப்பு ஆலோசகரும், மேனாள் அதிபருமான சூரியகுமாரி இராசேந்திரம் அவர்கள் வழங்கினார்.
வைரக்குடுவை தொகுதி 02 நூலினை சுவிற்சர்லாந்து தமிழர் களறி ஆவணவகம் வெளியீடு செய்திருக்கின்றது. குறித்த அமைப்பின் சார்பில் வெளியிட்டுரையினை கலாபூசணம் நடராசா இராமநாதன் (கோகுலன்) அவர்கள் வழங்கினார்.
