சுவிஸ் கூட்டாட்சி ஓய்வூதிய நிதியமான ‘பப்ளிகா’வின் (Publica) வெளிப்புற மென்பொருள் வழங்குநர் ஒருவர் மீது நடத்தப்பட்ட இணையத் தாக்குதலைத் தொடர்ந்து தரவுகள் கசிந்துள்ளன.
எந்தெந்தத் தரவுகள் பாதிக்கப்பட்டுள்ளன என்பது குறித்து இன்னும் தெளிவான தகவல் இல்லை. இது தொடர்பாக அட்டர்னி ஜெனரல் அலுவலகம் விசாரணையைத் தொடங்கியுள்ளதாக பப்ளிகா இன்று அறிவித்தது.
அந்த மென்பொருள் வழங்குநர் செப்ரெம்பர் மாத இறுதியில் தாக்குதலைக் கண்டறிந்து, அதன்பின்னர் இது குறித்துக் குற்றவியல் புகார் அளித்தார். மேலும், சம்பந்தப்பட்ட கூட்டாட்சி அதிகாரிகள், பப்ளிகா மற்றும் பிற வாடிக்கையாளர்களுக்கும் இந்நிறுவனம் தகவல் தெரிவித்தது.
ஓய்வூதிய நிதியத்தின் தரவுகள் எந்த அளவிற்குப் பாதிக்கப்பட்டுள்ளன என்பது குறித்துப் பல்வேறு கூட்டாட்சி அதிகாரிகளுடன் இணைந்து தற்போது விசாரணை நடைபெற்று வருகிறது.
தரவு கசிவு, அதன் சாத்தியமான விளைவுகள் மற்றும் எடுக்கப்பட்ட நடவடிக்கைகள் குறித்து பப்ளிகா காப்பீட்டாளர்களுக்குத் தகவல் அளித்துள்ளது. அந்த அறிக்கையின்படி, சம்பந்தப்பட்ட மென்பொருள் வழங்குநருடன் வேறு எந்தக் கூட்டாட்சி அமைப்புகளுக்கும் வணிகத் தொடர்புகள் எதுவும் இல்லை.
வழங்குநரின் அடையாளம் அல்லது கசிந்த தரவுகளின் தன்மை குறித்த கூடுதல் விவரங்கள் எதையும் பப்ளிகா வெளியிடவில்லை.
சுவிட்சர்லாந்தின் மிகப்பெரிய ஓய்வூதிய நிதியங்களில் பப்ளிகாவும் ஒன்றாகும். கூட்டாட்சி நிர்வாகம் மற்றும் சுவிஸ் கூட்டாட்சி தொழில்நுட்பக் கழகங்களின் (Swiss Federal Institutes of Technology) ஊழியர்களுக்கு இது காப்பீடு மற்றும் ஓய்வூதிய சேவைகளை வழங்குகிறது.
2025-ஆம் ஆண்டின் இறுதியில், இதில் சுமார் 70,000 செயல்பாட்டு உறுப்பினர்களும் 41,600 ஓய்வூதியதாரர்களும் இருந்தனர். இதன் மொத்த சொத்து மதிப்பு 45 பில்லியன் சுவிஸ் பிராங்கிற்கும் சற்று குறைவாக (சுமார் 54 பில்லியன் அமெரிக்க டாலர்கள்) இருந்தது.
மூலம்- swissinfo
