உணவுப் பாதுகாப்பு மற்றும் சுத்தமான குடிநீர் கிடைப்பது: ஒரு மக்கள் முன்முயற்சிக்குப் பின்னால் உள்ள குழு, சுவிஸ் விவசாயக் கொள்கையில் மாற்றங்களைக் கோருகிறது.
செப்டம்பர் 27 அன்று நடைபெறவிருக்கும் நாடு தழுவிய வாக்கெடுப்புக்கு முன்னதாக, வியாழக்கிழமை அது தனது பிரச்சாரத்தைத் தொடங்கியது.
“பாதுகாப்பான உணவுக்காக – நீடித்த உள்நாட்டு உற்பத்தியை வலுப்படுத்துதல், தாவர அடிப்படையிலான உணவை அதிகரித்தல் மற்றும் சுத்தமான குடிநீரை உறுதி செய்தல் ஆகியவற்றின் மூலம்” என்ற இந்த முன்முயற்சி, ஓகஸ்ட் 2024-ல் ஒரு குடிமக்கள் குழுவால் சமர்ப்பிக்கப்பட்டது.
இது, விலங்கு அடிப்படையிலான உணவுகளுக்குப் பதிலாக தாவர அடிப்படையிலான உணவுகளின் உற்பத்தியையும் நுகர்வையும் ஊக்குவிக்க வேண்டும் என்று கோருகிறது.
மேலும், சுவிட்சர்லாந்தின் விவசாயத் தன்னிறைவை 50%-க்கும் சற்றுக் குறைவாக இருந்து குறைந்தபட்சம் 70% ஆக உயர்த்துவதையும் இது நோக்கமாகக் கொண்டுள்ளது.
நிலத்தடி நீர் வளங்களைப் பாதுகாப்பதும், நீடித்த விவசாயம் மற்றும் வேளாண்-உணவுத் துறையை ஊக்குவிப்பதும் இதன் நோக்கங்களாகும். இந்த இலக்குகள் பத்து ஆண்டுகளுக்குள் அடையப்பட வேண்டும்.
இந்த நடவடிக்கைகள் “தேசியப் பாதுகாப்புக்கும் நமது நாட்டின் செழிப்புக்கும் இன்றியமையாதவை” என்று அக்குழு கூறியது.
இந்த கோரிக்கைகள், சாதாரண காலங்களிலும் நெருக்கடி காலங்களிலும் வாழ்க்கைக்கு அடிப்படையானவை என்று இந்த முன்முயற்சியின் ஆதரவாளரான ஃபிரான்சிஸ்கா ஹெரன், வியாழக்கிழமை பெர்னில் செய்தியாளர்களிடம் கூறினார்.
தற்போதைய உலகளாவிய நிச்சயமற்ற தன்மைகள் மற்றும் காலநிலை மாற்றம் ஆகியவற்றையும் அவர் தொடர்ந்து சுட்டிக்காட்டினார். இந்த மனுவின் அமைப்பாளர்கள், இறக்குமதிகள் நிறுத்தப்பட்டு பற்றாக்குறைகள் ஏற்படும் பட்சத்தில், சுவிட்சர்லாந்து தயாராக இருக்க தங்கள் முன்மொழிவு உதவும் என்று நம்புகிறார்கள்.
“இப்போதும் எதிர்காலத்திலும்”, மனித நுகர்வுக்கான உணவு முடிந்தவரை உள்நாட்டிலேயே உற்பத்தி செய்யப்பட வேண்டும் என்று விவசாயி டேவிட் ஜேக்கப்சன் கூறினார்.
மூலம்- swissinfo
