மேற்கு சுவிட்சர்லாந்தில் ஒரு பேருந்தில் ஆறு பேர் கொல்லப்பட்ட தீ விபத்து, சுவிட்சர்லாந்து நாட்டைச் சேர்ந்த ஒருவர் தன்னைத்தானே தீ வைத்துக் கொண்டதால் ஏற்பட்டதாக, ஆரம்ப விசாரணைகளில் தெரியவந்துள்ளது.
ஆரம்ப விசாரணை முடிவுகளின்படி, செவ்வாய்க்கிழமை மாலை 5:45 மணியளவில் ஃப்ரிபோர்க் மாகாணத்தில் உள்ள டுடிங்கனில் ஒரு நபர் பேருந்தில் ஏறி, மாலை 6:25 மணியளவில் கெர்சர்ஸில் தனக்குத்தானே தீ வைத்துக் கொண்டார். பின்னர் தீ வேகமாக முழு வாகனத்திலும் பரவியது.
சந்தேகத்திற்குரிய குற்றவாளி சுவிஸ் நாட்டவர் என்று நம்பப்படுகிறது. அவர் “தனிமைப்படுத்தப்பட்டவர் மற்றும் உளவியல் ரீதியாக நிலையற்றவர்” என்று அதிகாரிகள் நேற்றுப் பிற்பகல் கெர்சர்ஸில் நடந்த செய்தியாளர் சந்திப்பில் தெரிவித்தனர்.
அறுபது வயதுகளில் இருந்த அந்த நபர் காணாமல் போனதாக அவரது குடும்பத்தினரால் புகார் அளிக்கப்பட்டிருந்தது.
இந்த சம்பவத்தில் அவர் இறந்துவிட்டதாகக் கருதப்படுகிறது. அவர் பெர்ன் மாகாணத்தில் வசித்து வந்தார் என்றும் அதிகாரிகள் உறுதிப்படுத்தியுள்ளனர்.
இறப்பு எண்ணிக்கை ஆறு என்று அதிகாரிகள் உறுதிப்படுத்தியுள்ளனர். பாதிக்கப்பட்டவர்கள் பற்றிய கூடுதல் விவரங்கள் எதுவும் வழங்கப்படவில்லை.
உயிரிழந்தவர்கள் 1961 முதல் 2009 இற்கு இடைப்பட்ட ஆண்டுகளில் பிறந்தவர்கள். ஐந்து பேர் காயமடைந்தனர். அவர்களில் மூன்று பேர் ஆபத்தான நிலையில் உள்ளனர்.
காயமடைந்தவர்களில் ஒருவர் சூரிச் பல்கலைக்கழக மருத்துவமனையில் சிறப்பு தீக்காய தீவிர சிகிச்சைப் பிரிவில் சிகிச்சை பெற்று வருகிறார். காயமடைந்தவர்களில் இருவர் சம்பவ இடத்திலேயே சிகிச்சை பெற்றனர், மற்ற இருவரும் பலத்த காயமடைந்து வெவ்வேறு மருத்துவமனைகளுக்கு கொண்டு செல்லப்பட்டனர்.
அதிக அளவு எரிபொருள் மற்றும் ஒக்ஸிஜன் இருந்ததால் மிக விரைவாக தீபரவியதாக காவல்துறை அதிகாரி தெரிவித்தார்.
மூலம்- swissinfo